Qendra për të Drejtat në Punë, ka reaguar nëpërmjet një postimi në lidhje me situatën e naftëtarëve, e cila deri më tani nuk po gjen zgjidhje.
Në deklaratë bëhet me dije se qeveria nuk ka marrë asnjë masë këtë vit për të garantuar rikthimin e naftëtarëve në punë. Në postim, theksohet se prej më tepër se 10 vitesh rafineria ka rënë në duart e subjekteve spekulante të cilat marrin nga qeveria të drejtat e ushtrimit të aktivitetit, realizojnë fitime të jashtëzakonshme dhe largohen duke lënë jo vetëm pa punë mijëra naftëtarë, por edhe duke mos u dhënë atyre as pagat e prapambetura.
Ndër të tjera Qendra për të Drejtat në Punë, garanton naftëtarët e Ballshit, se ashtu siç ka bërë deri më tani, do të vazhdojë angazhimin për të garantuar të drejtat që ata kërkojnë.
Kujtojmë këtu që naftëtarët e Ballshit kanë protestuar përgjatë disa muajve në lidhje në lidhje me pagat që nuk kishin marrë në periudhën e pandemisë. Më tej, ata vijuan një grevë ku gratë qëndruan për 23 ditë me radhë, ndërsa burrat 22. Kryeministri Rama në atë periudhë reagoi duke u garantuar naftëtarëve një pagë prej 40 mijë lekësh të rinj, për një periudhë 1-vjeçare, por nëse në rafineri nuk do të afrohej asnjë investim, atëherë pagesa do të ndërpritej.
