Nga kjo javë e në vazhdim, qendrat e vaksinimit në Kosovë do të punojnë gjatë gjithë ditëve të javës, përfshij këtu edhe ditët e fundjavës dhe festat zyrtare, ka lajmëruar Ministria e Shëndetësisë në Kosovë.
“Mbështetur në vendimin e Ministrit të Shëndetësisë, Dr. Arben Vitia, që nga kjo javë, qendrat e vaksinimit do të punojnë gjatë gjithë ditëve të javës dhe festave zyrtare.
E gjithë kjo për të lehtësuar qasjen në procesin e vaksinimit dhe për t’iu përgjigjur kërkesës së madhe të qytetarëve për vaksinim” – thuhet në njoftim.
Kujtojmë se ditë më parë ministria njoftoi gjithashtu se tashmë një person mund të caktoj takimin për dhjetë persona njëkohësisht për t’u vaksinuar. MSH ka apeluar sërish te qytetarët që të caktojnë ditën për të marrë vaksinën kundër COVID-19.
