Kontrollet blic në kryeqytet kanë vënë në pranga 3 të rinj të cilat janë kapur në flagrancë duke shitur kokainë e kanabis. Forcat e Posaçme “Shqiponjat” bënë arrestimin në flagrancë të të riut me iniciale R. O, 22 vjeç, pasi në rrugën “Besim Imami” sapo ka parë prezencën e policisë, ka hedhur në tokë një qese transparente e dyshuar me lëndë narkotike kokainë.
Po ashtu policia ka vënë në pranga edhe dy adoleshentët e identifikuar me iniciale E. Sh, 17 vjeç dhe K. R., 17 vjeç, pasi në Rrugën e Bogdanëve, E. Sh, u kap në flagrancë duke shitur doza me lëndë narkotike kanabis, të cilat i siguronte nga K. R, i cili dyshohet se ishte organizatori i kësaj veprimtarie.
Në vijim të veprimeve, shërbimet e Policisë gjetën dhe sekuestruan një sasi lëndë narkotike, e ndarë në doza, gati për shitje, një shumë parash e dyshuar e përfituar nga shitja e lëndës narkotike, dhe sende të tjera të kundërligjshme.
