Për fjalimin e deputetit të Lushnjës nga radhët e PD, që bëri xhiron e rrjetit dhe shumë deputet të kësaj force u kritikuan për këtë veprim, ka reaguar deputeti Agron Gjekmarkaj dhe ka shpjeguar se e qeshura e tij gjatë fjalimit të kolegut nuk ka qenë përçmuese.
Në një intervistë për mediat, Gjekmarkaj tha se Korreshi foli me një sens të fortë humori dhe se ishte e pamundur për të që të rezistonte.
“Ka dy të qeshura, një e qeshur se diçka të pëlqen dhe një e qeshur, kur do ta tallësh ta përqeshësh një gjë. Dhe fjalimi në rastin e zotit Korreshi ishte një e qeshur kënaqësie, sepse na pëlqeu të gjithëve ajo që ai tha me një sens të fortë humori dhe ishte e pamundur t’i rezistoje të qeshurës. Nuk ishte përçmuese. Përçmuese ishte e qeshura që na kapi më vonë, kur folën ministrat e qeverisë,”– tha Gjekmarkaj.
Saimir Korreshi ka shkaktuar të qeshura në sallë gjatë fjalimit të tij në foltoren e Kuvendit teksa ishte duke renditur, sipas tij, mungesën e profesionalizimit nga ana e Policisë së Shtetit duke kaluar deri tek mbështetja financiare për familjet në nevojë. Gjatë gjithë kohës që ai fliste, deputetët socialistë dhe demokratë, përfshirë kryetarin e tij Lulzim Basha nuk e kanë mbajtur dot të qeshurën, për shkak të dialektit që përdori.
