Në një postim në rrjete sociale, deputetja e Partisë së Lirisë, Erisa Xhixho, denoncon situatën në Spitalin e Traumës, duke deklaruar se 8 salla kirurgjikale vijojnë të jenë jashtë funksionit, ndërsa i gjithë spitali punon me vetëm dy salla.
Xhixho akuzon qeverinë se, për shkak të tenderave dhe asaj që ajo i cilëson si afera korruptive, pacientët po përballen me vonesa në marrjen e shërbimit dhe po detyrohen t’u drejtohen spitaleve private.
Deputetja ngre shqetësimin veçanërisht për pacientët me trauma dhe ata që kanë nevojë për ndërhyrje urgjente, ndërsa e lidh situatën me politikat e qeverisë në shëndetësi dhe përmend edhe çështjen e KAYO-s si shembull të asaj që ajo e quan “aferë korruptive”.
Postimi i plotë:
Sot jam në Spitalin e Traumës dhe, siç kam denoncuar muaj më parë, ende sallat kirurgjikale janë jashtë funksionit.
I gjithë Spitali i Traumës punon me vetëm 2 salla kirurgjikale.
Pacientë që presin dhe mjekë që nuk japin dot shërbim, ndërsa asnjë masë nuk merret.
Sepse tenderat dhe vjedhjet që bën kjo qeveri bëjnë që, edhe pas 1 viti që ka filluar rikonstruksioni, ende të mos jenë në funksion 8 salla kirurgjikale.
Dhe nga ajo që pashë, do të duhen edhe 6 muaj deri në 1 vit që të vihen në funksion të plotë.
Dhe çfarë bën kjo situatë?
Që pacientët t’i drejtohen privatit, klient të qeverisë, dhe të mos marrin shërbimin falas që propagandohej nga qeveria.
Por a mund të presë një i aksidentuar?
A mund të presë pacienti me traumë?
A mund të presë një pacient që ka nevojë për ndërhyrje ortopedike?
Vetëm në shtetin e Edi Ramës duhet të sëmuremi dhe të shërohemi kur thotë kjo qeveri.
Sepse prioritet për këtë qeveri janë aferat korruptive, si ajo e KAYO-s, që do të bëhet në shëndetësi për të monopolizuar sektorin farmaceutik, dhe jo shërbimi ndaj qytetarëve.
Ndaj, qytetarë të nderuar, mos prisni më asgjë nga kjo qeveri, sepse çdo hallkë e këtij sistemi ka dështuar.
Discussion about this post