Administrata e presidentit amerikan të zgjedhur po merr gjithnjë e më shumë formë. Donald Trump ka emëruar senatorin nga Florida, Marco Rubio, për Sekretar të Shtetit të Shteteve të Bashkuara. Kështu shkruan “New York Times”.
Rubio u zgjodh në Senat në vitin 2010 dhe ka qenë gjithmonë aktiv në politikën e jashtme, duke mbajtur qëndrime të ashpra ndaj Kinës dhe Iranit në veçanti. Për luftën në Ukrainë, ai deklaroi së fundmi se nevojitet një “përfundim”. Pavarësisht se u lakua si zëvendëspresident, senatori i Floridas i qëndroi besnik Trump dhe mbajti disa mitingje në favor të tij. Presidenti i zgjedhur i Shteteve të Bashkuara ka vendosur të emërojë kongresmenin republikan Mike Waltz nga Florida si këshilltarin e tij për sigurinë kombëtare.
Waltz në të kaluarën ka kritikuar ashpër aktivitetin kinez në Azi-Paqësor dhe ka shprehur nevojën që Shtetet e Bashkuara të përgatiten për konflikte të mundshme në rajon. CNN, duke cituar dy burime të mirëinformuara, raporton se Trump do të nominojë Kristi Noem, guvernatoren e Dakotës së Jugut, në postin e Sekretares së Sigurisë Kombëtare. Mediat e konsiderojnë atë një figure besnike të Trump, ndërsa në dorë do të ketë gjithçka, nga Doganat dhe Mbrojtja e Kufijve të SHBA-së te Emigracioni dhe Doganat, e deri tek Agjencia Federale e Menaxhimit të Emergjencave dhe Shërbimi Sekret Amerikan.
Noem kishte qenë gjithashtu në listën e ngushtë të Trump për postin e zëvendëspresidentit, por ishin zbulimet e saj për vrasjen e qenit të gjuetisë, Cricket, që i kushtuan asaj postin në fjalë. Lee Zeldin është përzgjedhur si shef i Agjencisë Amerikane për Mbrojtjen e Mjedisit. Sakaq, i ashtëquajti “cari i kufirit, Tom Homan, që do të jetë në drejtim të sigurisë kufitare, u shpreh i gatshëm për të nisur fushatën e dëbimeve të emigrantëve të paligjshëm. Madje tha se do t’i ndjekë ata kudo që janë, edhe në vendet e punës. Sakaq, republikanët po shkojnë drejt marrjes së kontrollit të plotë të Kongresit dhe pas Senatit mund të zotërojnë dhe maxhorancën në Dhomën e Përfaqësuesve.
Discussion about this post