Qeveria e Kosovës vendos mbylljen e Klan Kosova. Njoftimi është dhënë nga Ministria e Industrisë, sipas të cilës, Komisioni për Shqyrtimin e Ankesave për Regjistrimin e Bizneseve nuk ia ka pranuar ankesën dhe ka vendosur t’ia pezullojë përfundimisht.
Ministria e Industrisë, Ndërmarrësisë dhe Tregtisë së Kosovës, përmes një reagimi në rrjetet sociale shprehet se për ta kjo çështje ka mbaruar, e se çështja tashmë do të kaloj në Gjykatë.
Më 14 Qershor, Ministria e Industrisë, Ndërmarrësisë dhe Tregtisë në Kosovë i pezulloi licencën televizionit “Klan Kosova” me arsyetimin se ka dyshime për keqpërdorim të detyrës zyrtare, si dhe keqpërdorim të autorizimeve ekonomike. Nga ana e televizionin Klan Kosova pati një ankesë dhe vendimi u mor sot nga Komisioni për Shqyrtimin e Ankesave për Regjistrimin e Bizneseve.
Rreth 3 javë më parë, i pranishëm në studion e Klan Kosova ishte edhe Kryeministri Edi Rama, i cili në kuadrin e sulmeve ndaj Kryeministrit Albin Kurti renditi edhe vendimin për pezullimin e licencës së Klan Kosova, duke harruar se në Shqipëri ka mbyllur të paktën 1 televizion, i cili i ka kushtuar shqiptarëve miliona euro, në formën e një gjobe të vendosur nga Gjykata e Arbitrazhit.
Reagimi i Ministrisë së Industrisë në Kosovë:
Ministria e Industrisë, Ndërmarrësisë dhe Tregtisë, njofton opinionin publik se, Komisioni për Shqyrtimin e Ankesave për Regjistrimin e Bizneseve ka marrë sot vendim për refuzimin e ankesës së Shoqërisë Tregtare “Klan Kosova sh.p.k.”. Vendimi i Komisionit e përmbyll këtë rast brenda Ministrisë, ndërsa pala ankuese gëzon të drejtën për të parashtruar padi në gjykatën kompetente.
Vendimi i Komisionit konstaton se ARBK-ja, në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.
Arsyetimi i ARBK-së për pezullimin e certifikatës ka qenë se, në dokumentet e regjistrimit të kompanisë pronare të biznesit në fjalë, “KGO Media Invest DOOEL”, komunat e Republikës së Kosovës paraqiten si qytete të Serbisë, gjë që përbën shkelje të Kushtetutës sonë. Vetë fakti që përfaqësuesit e Klan Kosovës sh.p.k., pas kaq shumë vitesh, kanë nisur hapa për korrigjim, vërteton se biznesi në fjalë e kishte kryer shkeljen e konstatuar nga ARBK-ja dhe se vendimi për pezullimin e certifikatës së biznesit ishte marrë me të drejtë.
Mirëpo, Komisioni i Ankesave ka evidentuar po ashtu se përpjekjet e vonuara të palës për t’i korrigjuar shkeljet e saj ndër vite, ende nuk kanë shkuar deri në fund. Vendimi i Komisionit konstaton se, në dokumentet zyrtare për “pronarët e vërtetë të subjektit” KGO Media Invest DOOEL, shtetësia e pronarit të këtij subjekti identifikohet si “Kosovo”, ndërsa shteti i vet ende si “Serbia”, duke e paraqitur përsëri Kosovën si pjesë të Serbisë. Ky konstatim i Komisionit ngre edhe një herë pyetjen, cila është arsyeja e vërtetë pse Klan Kosova sh.p.k. po insiston ta paraqesë Kosovën si pjesë të Serbisë?
Me këtë rast, rikujtojmë se në bazë të gjetjeve të parregullsive ndër vite dhe dyshimeve serioze, MINT ka dorëzuar kallëzim penal kundër Klan Kosova sh.p.k. dhe pronarëve të saj. Me këtë çështje tashmë po merren organet e rendit të Republikës së Kosovës.
Discussion about this post