Edhe pse në javët e fundit rezervat ujore në vend po shtohen dhe kështu mund të përballojnë prodhimin e energjisë elektrike, qeveria ka vendosur që gjendja emergjente të vazhdojë deri në fund të këtij viti.
Kujtojmë se, në vendimin e parë të publikuar, shkruhej se gjendja do të zgjaste deri në datën 15 Prill të vitit 2022. Por në vendimin e publikuar ditën e sotme në fletoren zyrtare, Këshilli i Ministrave ka vendosur që të shtyjë gjendjen e emergjencës energjetike për vendin, deri në datën 31 dhjetor të këtij viti.
“Këshilli i Ministrave vendosi: Në vendimin nr.584, datë 8.10.2021, të Këshillit të Ministrave, bëhen këto ndryshime: 1. Pika 3 shfuqizohet. 2. Pika 5 ndryshohet, si më poshtë vijon: “5. Gjendja e emergjencës në furnizimin me energji elektrike i shtrin efektet deri më 31 dhjetor 2022”, thuhet në dokumentin e Publikuar në Fletoren Zyrtare. Sakaq, bëhet me dije se ky vendim ka hyrë në fuqi menjëherë dhe tashmë është faktike që vendi do të vazhdojë të jetë në emergjencë energjetike deri në dhjetor.
Discussion about this post