Në kohën kur borxhi publik ka arritur vijën e kuqe, qeveria jonë nuk i ndal hapat për rritjen e tij. Përmes një marrëveshje të fundit, qeveria parashikon të marrë 60 milionë euro hua nga Banka për Zhvillim e Këshillit të Europës për menaxhimin e situatës së pandemisë COVID-19. Në projektligjin e publikuar në Kuvend thuhet se, përmes kësaj kredie do të financohet punësimi shtesë i mjekëve, infermierëve dhe blerja e vaksinave, duke përfshirë edhe koston e transportit dhe magazinimit të tyre.
Në relacionin bashkëngjitur projektligjit, bëhet me dije se nëpërmjet kredisë në fjalë do të sigurohen edhe fondet e nevojshme për pagat e punës jashtë orarit të personelit mjekësor dhe jo mjekësor, që shërbejnë për trajtimin e pacientëve me Covid-19. Po ashtu përcaktohet se huaja do të përdoret dhe për blerjen e pajisjeve mjekësore, sigurimin e medikamenteve dhe kiteve diagnostikuese për koronavirus e pajisjeve mbrojtëse.
Ndër të tjera bëhet me dije se, huaja që do të akordohet është me afat maturimi 15 vjet ndërsa norma interesit do të përcaktohet mbi bazën e tregut në momentin e disbursimit. Gjithashtu, ky do të përdoret dhe për rehabilitimin e përshtatjen e spitaleve për trajtimin e të infektuarve me koronavirus. Pra, pavarësisht se 2.7 miliardë lekë vetëm për pandeminë, ende nuk i dalin paratë për të paguar orët shtesë të mjekëve. Ndërsa ka shumë raste kur mjekët ankohen se nuk kanë marrë pagesat për orët shtesë të punës në shërbim të pacientëve me koronavirus.
Discussion about this post