Nënkryetarja e PD Jorida Tabaku, njëkohësisht anëtare e komisionit të Ekonomisë dhe Financave ka folur në lidhje me Borxhin Publik. E ftuar në emisionin RinOn, Tabaku u shpreh se Borxhi Publik ka qenë një shqetësim real për opozitën që në nisje të mandatit të qeverive Rama.
Tabaku u shpreh se niveli 80% i borxhit është shumë i lartë, por jo real pasi nëse përfshihen borxhi i fshehur i Arbitrazhit dhe gjithashtu edhe PPP që duhet të kontabilizohen si të tillë, borxhi real sot është 92% i PBB. Tabaku argumentoi se justifikimet e qeverisë me tërmetin dhe pandeminë janë alibi pa bazë pasi qeveritë janë votuar pikërisht për këto situata.
U mor një borxh 1 mld euro gjatë pandemisë dhe vetëm 120 mln euro u dhanë si ndihmë për ekonominë, të gjitha borxhet e rindërtimit janë mbartur për në vitin aktual. Vlera e saktë e borxhit sipas Tabakut, duhet të shihet nën dritën e KLSH dhe raporteve të FMN.
“KLSH raporton se faturat e Gjykatës së Arbitrazhit duhet të ishin llogaritur në Borxhin Publik sikundër FMN thotë që PPP duhet të ishin llogaritur gjithashtu. Llogaritur të gjithë këto shkojnë në 12% të GDP-së, shtuar borxhin 80.1% shkojmë në 92% të GDP, u shpreh znj. Tabaku.
Nënkryetarja e PD u shpreh se çështja e borxhit është një debat i nxehtë pasi është diskutuar shumë shpesh në Komisionin e Ekonomisë dhe Financave duke qenë se disa javë më parë është marrë EUROBOND 700 mln euro. Borxhi i rritur sipas saj dhe mënyra se si qeveria po e merr atë e ka kthyer në një risk të madh buxhetin e shtetit.
“Për herë të parë në 20 vitet e fundit borxhi kalon nivelin e 80% të PBB dhe reali është në 92%. Kjo është një vijë e kuqe sepse pagesat e interesit janë rritur për borxhin dhe shkojnë në rreth 100 mln euro dhe ndërkohë që borxhi merret vazhdimisht për të shlyer borxhin. Sot rreziku më i madh i ekonomisë janë PPP korruptive qe po paguhen me borxhin e rritur!”, shtoi Tabaku.
Sipas Tabakut, rritja e borxhit duhet të na shqetësojë pasi na rrezikon buxhetin në periudhën afatmesme dhe atë afatgjatë.
Discussion about this post