Kryetari i Bashkisë Tiranë, Erion Veliaj, si “tifozi më i zjarrtë” kuqezi mbështeste dje kombëtaren shqiptare për sfidën në transfertë ndaj Hungarisë, duke publikuar në rrjete sociale foto dhe mesazhe në mbështetje të tyre. Madje, ai përdori sloganin “Shumë pranë ëndrrës Katar 2022”, duke publikuar një foto gjatë stërvitjes së djemve kuqezinj, vetëm pak orë para ndeshjes. Por kur kishin mbetur vetëm pak minuta për të filluar ndeshja, Veliaj nuk ishte në shtëpi, apo në ndonjë ambient për të parë ndeshjen, por ndodhej në kinema, ku kishte organizuar një mbrëmje me personalitete të ndryshme për premierën e filmit “No time to die” ose i njohur si filmi “Agjenti 007”. Kryebashkiaku i Tiranës, Erion Veliaj, kryeprokuori i SPAK, Arben Kraja, Prokurori i Përgjithshëm, Olsian Çela, e ministri i Brendshëm Bledi Çuçi, me bashkëshorten Delina Fico dhe kryepolicin e ri Gledis Nano, ishin disa nga figurat tona shtetërore që braktisën kombëtaren në një sfidë të rëndësishme për ëndrrën e Botërorit, duke u rreshtuar për të parë premierën e 007-s, të cilët mund ta shikonin edhe ndonjë ditë tjetër, ose të blinin një DVD.
Megjithatë, kryebashkiaku Veliaj, i njohur botërisht për “qokat” e tij pa ndjenjë, por që i kërkon detyra, këtë herë kishte vendosur që qokën e radhës ta bënte për ambasadorin britanik Alastair King-Smith, i cili u shfaq i veshur me kostumin e zi dhe syze të zeza nga automjeti i tij drejt premierës së filmit “No time to die”. Madje, në kinema Millenium ishte e pranishme edhe ambasadorja e SHBA në Tiranë, Yuri Kim.
Dikush mund të thotë “çfarë të keqe ka se ai ka zgjedhur të shikojë një film, përpara kombëtares kuqezi”. Por pikërisht këtu, Erion Veliaj nuk i lë vend imagjinatës, pasi si “qokaxhi i thekur” humb vetëdijen dhe bën veprime mekanike, me qëllim që të shtiret sikur i interesojnë të gjithë. Kështu veproi edhe mbrëmë, kur ende pa përfunduar premiera, kombëtarja shqiptare kaloi në avantazh, nëpërmjet një supergoli të talentit Broja, gol i cili i dha fitoren Shqipërisë në Hungari. Aty Veliaj u kujtua se luante kombëtarja dhe menjëherë bëri postimin e radhës në rrjetet sociale me foton e Brojës, duke dashur t’i rrëmbejë bukurinë festës së tifozëve të vërtetë, e duke dashur t’i hedhë hi syve të gjithëve. E ndoshta me të drejtë, shumë shqiptarë pyesin sot, Z. Veliaj çfarë ndoqe mbrëmë, shfaqjen propagandistike me të cilën pushtove kinemanë, apo kombëtaren, pasi të dyja luheshin në të njëjtën kohë. Apo meqë shfaqja jote nuk pati shumë ndjekës, the të hidhen njëherë nga ana tjetër. Gjithsesi, qokat shpesh herë janë ushqim për shpirtin, por populli ka një shprehje, “kur diçka bëhet bozë”, më mirë mirë mos e përdor më, e mos ua prish festën atyre që vërtetë e kanë “Ëndrrën Katar 2022”.
Gijotina.com
