Thellohet skandali me Kuvendin e Shqipërisë. Enkelejd Alibeaj, njëkohësisht drejtues i partisë ‘Djathtas 1912’, pjesë e koalicionit ‘Djathtas për Zhvillim’, denoncoi shoqëruar me foto një postim në faqen e Kuvendit të Shqipërisë, ku bëhej fushatë për numrin 5 dhe Partinë Socialiste. Ndërkohë që, institucioni i Kuvendit është shtetëror dhe nuk është as i Partisë Demokratike dhe as i Partisë Socialiste.
Teksa postoi fotografinë e kapur nga faqja e Kuvendit, Alibeaj shkruan se organi më i lartë që presupozohet i të gjithë shqiptarëve, është hedhur në fushatë. Ai theksoi se kjo fotografi është vepër e pastër penale dhe dënohet me ligj.
Në reagimin e Kuvendit thuhet se shërbimet e institucionit gjatë ushtrimit të detyrës mbështeten në parimet e profesionalizmit dhe të paanshmërisë. Në reagim thuhet gjithashtu se faqja dhe rrjetet sociale nuk janë përfshirë dhe nuk do të përfshihen në asnjë mënyrë apo formë në fushatën e zgjedhjeve parlamentare.
Pra, Kuvendi justifikohet duke përmendur funksionet e tij dhe nuk e pranon postimin i cili është zhdukur nga faqja e Facebook.
“Kuvendi i Shqipërisë është një institucion demokratik pluralist gjithëpërfshirës, përfaqësues i vullnetit të popullit dhe i të gjitha forcave politike.
Sqarojmë opinionin publik se shërbimet e Kuvendit, gjatë ushtrimit të detyrave të tyre, bazohen në parimet e profesionalizmit dhe paanshmërisë.
Kuvendi i Shqipërisë garanton opinionin publik se administrata dhe shërbimet, faqja dhe rrjetet sociale të tij nuk janë përfshirë dhe nuk do të përfshihen në asnjë mënyrë dhe në asnjë formë në fushatën e zgjedhjeve parlamentare.
Zyra e Shtypit e Kuvendit”, shkruhet në postimin në “Facebook”.
Discussion about this post