Rakip Suli vijon çmendurinë e tij, ku do të shpenzojë plot 5.4 milionë euro për godinën e re të Bashkisë së Kamzës. Një fond tepër i lartë, kur në fakt godina ekziston dhe funksionin për bukuri në atë qytet. Por, Suli tashmë po mendon më shumë për luksin e tij dhe të vartësve, ku duket se nuk pyet më as për Stadiumin e Kamzës. Pasi falimentoi skuadrën, tashmë i erdhi radha fushës, ku në vend të saj tashmë do të “luajë” Suli, nënkryetaret dhe drejtorët e bashkisë.
Duket një plan tepër i dyshimtë, pasi nga njëra anë hapet tenderi 5.4 milionë euro për godinën dhe nga ana tjetër prishet stadiumi ekzistues dhe degdiset në Valias, ku shpenzohen sërish miliona euro për të ndërtuar. Por, në vend që ato para të shkonin për vepra publike, Suli i bën për godina. Në të njëjtën kohë, vetë Suli hap tender me vlerë rreth 400 mijë euro për të strehuar shtresat në nevojë. Diferencën mund ta bëjë kushdo, pasi për kolltukët e tij dhe të vartësve apo vartëseve do shpenzojë miliona euro dhe për shtresat në nevoje, kacidhe!
Sipas dokumenteve që disponon VoxNews, Bashkia e Kamzës ka hapur tenderin me objekt “ndërtimi i parkimit me 1 kat nëntokë, objekti 3 kat i bashkisë dhe rehabilitimi i sheshit”. Fondi limit është plot 533.886.935 lekë, ose mbi 5.4 milionë euro.
Ndërkohë, në të njëjtën kohë u hap edhe tenderi “përmirësim i banesave ekzistuese për komunitete të varfra dhe të pa favorizuara”, me një vlerë prej 38 milionë lekë. Shumëfish më pak sesa tenderi për zyrën e Sulit!
Por, Rakipi e ka filluar kohë më parë planin e tij. VoxNews ka raportuar edhe më parë se ai hapi tenderi me vlerë 2.2 mln euro për stadiumin në Valias. Në këtë mënyrë prishi stadiumin ekzistues për t’i hapur rrugë ndërtimit të bashkisë në stadiumin e vjetër.
Në fillim të vitit 2024, Suli hapi një tender për projektin e Bashkisë së re të Kamzës, në territorin e stadiumit, i cili ka funksionuar për vite me radhë dhe i lënë në harresë me dashje nga strukturat qendrore dhe lokale. Disa javë më vonë, pas publikimit të këtij skandali, ai u tërhoq duke anuluar edhe procedurën.
Por, muajt kaluan dhe Rakip Suli ka vijuar me hapin e radhës. Për ti paraprirë një tjetër akuze për të prishur stadiumin ekzistues, ai ka lëvizur “gurët” për të ndërtuar një stadium të ri. Ai hapi disa muaj më parë tenderin për ndërtimin e një fushe të re sportive. Objekti i procedurës së prokurimit është “ndërtimi i fushës së sportit Valias si dhe ndërtimi i godinës + shkallaret”. Fondi për këtë procedurë është plot 221.499.465 lekë, 2.2 milionë ose me TVSH shuma shkon në plot 2.5 milionë euro.
Kaq shumë para të ketë Bashkia e Kamzës sa të prishë stadiume, të bëjë godinë të re të bashkisë dhe të ndërtojë stadium të ri?!
Një abuzim i pastër me pushtetin, pasi godina e Bashkisë së Kamzës, ajo ekzistuesja, është tepër e madhe dhe me disa kate. Ndoshta fryrja e administratës ka sjellë nevojë për kapacitete të reja, por nëse do të kishte një studim ai do të ishte se si të vihen në punë njerëzit, punonjësit, dhe jo ëndrrat për zyra dhe stadiume të reja!
VoxNews ka raportuar më herët për dokumentet e dala nga Bashkia e Kamzës, e cila në fillim të vitit 2024 hapi një tender me objekt “projektim i ndërtimit të parkimit me 1 kat nëntokë, objekti 3 kat i bashkisë dhe rehabilitimi i sheshit”, me një fond 8.225.758 lekë. Në atë kohë, procedura kishte firmën e Rebeka Sulejmani, zv.kryetare e Bashkisë së Kamzës, pasi vetë kryetari Rakip Suli ndoshta ka pasur frikë të firmoste.
Në dokumentet shoqëruese, Suli kërkonte shfrytëzimin e një sipërfaqe prej 13.000 m2 të stadiumit ekzistues për të ndërtuar godinën e re të Bashkisë së Kamzës. Në letra shkruhet se fusha e futbollit “është në gjendje të përkeqësuar për shkak se aty nuk ka më aktivitete sportive dhe vetë kushtet e saj janë të papërshtatshme”.
“Është një sipërfaqe totale prej 13.000 m2 e cila do të shkatërrohet dhe për shkak se është një ambient mjaft i bollshëm, aty do të ndërtohet godina e re e bashkisë me të gjitha ambientet në dispozicion të qytetarëve. Për të plotësuar nevojat e bashkisë por edhe të vizitorëve të bashkisë propozohet parkim nëntokësor me sipërfaqe 3.000 m2. Godina e propozuar bashkiake ka një sipërfaqe prej 1.664 m2 të ndarë në tre kate, edhe 318 m2 bodrum” shkruhej në këto dokumente. Vetë ekipi i Kamzës u përjashtua nga FSHF-ja në vitin 2019, pas një sherri në atë stadium.
/VoxNews/
Discussion about this post