Kryetari i Bashkisë Kamëz, Rakip Suli, sapo ka hedhur 145 milionë lekë për kosha plehrash. Çdo ditë është prokurim dhe secili prej tyre ka brenda manipulim. Me firmën e kryetarit këtë herë milionat do të shkojë për kontejnerë. Ky tender ka si objekt ‘Blerje kontejnerë për mbeturina’.
Ne kemi shqyrtuar dokumentet e këtij prokurimi dhe rezulton se do të blihen 350 kazanë mbeturinash me material çeliku, të thjeshtë.
Nga kërkimet në treg një kosh i tillë i kategorisë së thjeshtë kushton nga 15 deri 19 mijë lekë të reja. Pra në total, Suli do duhej të shpenzonte 52.5 milionë lekë ose maksimumi 66.5 milionë lekë.
Nuk arrijë ta shpjegojmë se si e ka përllogaritur komisioni i Sulit fondin 145 milionë lekë!
Duke shtuar këtu faktin që as nuk ka përcaktuar zonat që kanë nevojë për kosha të rinj, që të kuptojmë se si u llogarit shifra 350 kontejnerë.
Sipas të dhënave nga dokumentet, në këtë prokurim kanë dorëzuar oferta për konkurrim 7 kompani, por Suli e kishte ndarë mendjen se kujt do t’ia bënte qokën këtë herë.
Prandaj, 6 firma janë përjashtuar nga gara që në fazën e parë, edhe pse 4 prej tyre kishin ofertat më të lira, nga 135 milionë lekë. Suli nuk lejoji për në finale as ofertën tjetër që ishte në të njëjtën vlerë me atë të firmës LUAR Bros, e cila u shpall fituese.
Më konkretisht, pasi komisioni e eliminoi konkurrencën, kompania “LUAR BROS” mbeti oferta e vetme me 140 milionë lekë. Pra, kontrata iu bë dhuratë duke shkelur rregullat e prokurimit..
Open Data Albania e ka shënuar tenderin me flamur të kuq, që tregon riskun e korrupsionit. Derisa kryeministri Rama të kontraktojë robotin AI për tenderat, kryebashkiaku Suli ka “licencë” të shpërdorojë fondeve e bashkisë.
Kujtojmë se Kryetari i bashkisë Kamëz, Rakip Suli, është paraqitur dy herë në SPAK në nëntor 2023.
SPAK po kryen hetime për veprat “Ushtrim i ndikimit të paligjshëm”, “shpërdorim detyre”, “shkelje e barazisë në tendera” dhe korrupsion, pas kallëzimit të banorëve të Kamzës.
Rakip Suli është denoncuar edhe nga një grup këshilltarësh të bashkisë Kamëz, duke iu referuar raportit të KLSH-së pas kontrollit në këtë institucion.
Burime bëjnë me dije se SPAK po kryen hetime për zyrtarë të bashkisë Kamëz, lidhur tendera të pastrimit të qytetit dhe dëmshpërblimet për tërmetin. Pas kallëzimeve të mbërritura në strukturën antikorrupsion, ky institucion ka regjistruar procedim penal, ndërsa hetimet po kryhen nga prokurori Elvin Gokaj. Mësohet se për këtë çështje janë thirrur dhe janë marrë në pyetje disa drejtorë të këtij institucioni dhe janë sekuestruar dokumente nga bashkia.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post