Kryebashkiaku i Kamzës, Rakip Suli, iu është vënë keq fondeve të shkollave dhe të rrugëve, duke shpikur skema për abuzimin. Këtë herë ka shfrytëzuar blerjen e karrigeve, tavolinave, rafteve të reja për shkollën 9-vjeçare “Azem Hajdari”. Më datë 13 nëntor 2023 është hapur tenderi me objekt “Blerje mobilieri për shkollën 9-vjeçare “Azem Hajdari””, për të cilin është lënë në dispozicion 80 milionë lekë. Por Suli edhe për kaq lekë, bën të pamundurën duke ua kaluar miqve të tij.
Shohim se në fillim për këtë tender kanë shfaqur interes të marrin pjesë në garë 9 kompani, me oferta të ndryshme. Por, janë lodhur më kot, sepse Suli nuk e njeh garën dhe konkurrencën, çdo gjë e paracakton vetë nga fillimi në fund.
Kështu ka vepruar edhe me projektin në fjalë. Në ditën kur është mbyllur gara dhe duhej bërë shqyrtimi i të gjithë ofertave, Suli i ka rënë shkurt duke skualifikuar 8 prej pjesëmarrësve.
Kështu, në fazën përfundimtare mbeti e vlefshme vetëm oferta e firmës ERALD, në pronësi të Arjan Mujës.
Duke qenë se nuk pati asnjë konkurrent tjetër përballë, në fazën përfundimtare të prokurimit Muja ka përfituar automatikisht tenderin dhe më pas kanë firmosur kontratën me Rakip Sulin.
Ndërsa vëmë re se disa prej kompanive janë skualifikuar me argumentin se janë paraqitur me vonesë për të dorëzuar mostrat e produktit. Në këtë pikë Suli mund të jepte një afat shtesë, sepse edhe ligji i krijon këto lehtësi. Ndërsa kryetari nuk ka ecur fare në direktivat e ligjit, por në interesin e vet, sepse e kishte ndarë mendjen më herët që këto para do t’i ndajë me Mujën.
Prandaj, tenderit i është vënë “Red Flag” nga Open Data Albania, për të treguar riskun e abuzimit duke hedhur dyshime nëse shkolla do të pajiset vërtetë me mobilje cilësore.
Kjo mbetet për t’u parë pas 45 ditësh kur të ketë përfunduar edhe afati i tenderit!
Kujtojmë se një muaj më parë, Rakip Suli ishte dy herë në SPAK, ku pas dëshmisë në Prokuroria tha se “drejtësia duhet të lihet të bëjë punën e saj”. Hetimet në bashkinë e Kamzës po kryhen për shpërdorim detyre dhe shkelje të barazisë në tendera për dy episode, shkelje e barazisë në tendera për pastrimin dhe fondet e tërmetit.
Lexo edhe: Oktapodi Yzedin Bozhaj ushqehet nga Rakip Suli me 500 MLN lekë, i fal tenderin e rrugës “Ahtisari”
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post