Kryeministri Edi Rama vijon kritikat ndaj homologut të tij Albin Kurti, ndërsa shprehet se nuk mund ta mirëkuptojë atë për situatën e krijuar mes Kosovës dhe ndërkombëtarëve.
Prej javësh Kryeministri Rama ka shigjetuar Kurtin lidhur me qëndrimin e tij dhe mënyrën e menaxhimit të situatës së tensionuar në Veriun e Kosovës, ndërkohë që Kreut të Qeverisë shqiptare, i është kërkuar nga faktorë dhe aktorë politikë në Tiranë e Prishtinë, që ti qëndrojë në krah Kosovës.
Në një intervistë për Euronews Albania, Rama tha se Albin Kurti nuk mund të fitojë betejat diplomatike si Don Kishot, ndërsa shtoi se plani franko-gjerman s’mund të qëndrojë aty për gjithë jetën.
“Albini është një person të cilin unë e çmoj, një mik që e respektoj, por në këtë rast është kryeministri i Kosovës të cilin unë nuk e mirëkuptoj”, tha Rama.
Sipas tij, Kurti, qeveria e Kosovës, policia dhe gjithë autoritetet duhet të kapen fort për t’ia dalë që të hedhin hapin e madh të çlirimit përfundimtar nga hija e mosnjohjeve dhe t’ia dalin që mbi të gjitha të normalizojnë marrëdhëniet me Serbinë.
“Pasi ka arritur në këtë pikë, pasi e ka futur Serbinë në një kuadrat të ngushtë, bashkësia euroatlantike nuk arrin dot as ta kuptojë, as ta justifikojë dhe as ta tolerojë sjelljen e autoriteteve të Kosovës dhe qasjen e kryeministrit, Albinit që është një sjellje sikur kjo tjetra të mos ekzistonte, sikur të ishim kushedi sa vite para dhe sikur gjithë ky proces të mos kishte ndodhur.
Ndërkohë kur ne kemi të gjithë bashkësinë euroatlantike të gatshme që ta shtrëngojë Serbinë, që të pranojë më në fund, në mos njohjen formale, të pranojë heqjen dorë de facto nga Kosova dhe hapjen e rrugës për njohjen e të gjithë të tjerëve që detyrimisht pastaj do të çojë në njohjen formale të Serbisë, është e pashpjegueshme se çfarë kërkojnë autoritetet e Kosovës që i kundërvihen këtij procesi”, u shpreh Rama.
Sipas tij, kjo pengesë në rrugën e procesit, në mënyrë të pavetëdijshme po ndihmon lojën e Kremlinit.
Lidhur me planin franko-gjerman, Rama tha se ky plan mund të fitohet me diplomaci e aleatë, por jo duke mbajtur në komunat e Serbisë, kryetarët e izoluar.
“Shqipëria është e gatshme që të jetë krah për krah Kosovës për ta shtyrë atë proces, por ajo bëhet në tryezë. Këtë kërkojnë miqtë tanë. Si more u bëmë pa pritur e pa kujtuar naivë, si u bëmë njerëz negativ ndaj Kosovës, si u bëmë njerëz që nuk po e kuptokan Kosovën të gjithë ata që për Kosovën kanë vënë në tel emrin e tyre, kredibilitetin e tyre, kanë vënë në tel gjithë reputacionin e tyre?
Si more qenka kjo punë që në Bruksel e në Uashington na dolën njerëzit që po luftokan Kosovën e po luftokan Albinin për llogari të Serbisë se nuk po kuptokan Serbinë e nuk qenkan të balancuar?
Çfarë janë këto mo? Kjo është të futesh në një vorbull dhe të mbytesh me një lugë ujë, është e pamundur të shihet kështu kjo situatë. Si more qenkan amerikanët dhe europianët ata që s’po kuptokan Kosovën e po i jepkan një dorë Serbisë?”, tha Rama.
Discussion about this post