Ndërsa kryeministri Edi Rama ndodhet para Komisionit Hetimor dhe po dëshmon për inceneratorët, presidenti Ilir Meta ndodhet në Durrës për shkak të një aktiviteti, ku komentoi ndër të tjera edhe këtë aferë korruptive.
Meta tha se është përgjegjësia e institucioneve të drejtësisë të flasin për inceneratorët, në bazë të provave dhe fakteve dhe për të ndaluar abuzimet e rënda me taksat e qytetarëve. Ndër të tjera Meta u bëri thirrje qytetarëve në të 6 bashkitë e vendit që të votojnë për të vendosur të ardhmen e tyre.
“Është kënaqësi që jam në Durrës meqenëse jemi para datë 6 mars duhet të theksoj se demokracia është vendore, lokale dhe duhet një rritje e përgjegjësisë së qytetarëve për të përmirësuar veten e tij për një qeverisje sa më të hapur. I ftoj të gjithë qytetarët që ta shfrytëzojnë këtë mundësi që u jep demokracia që të kenë të drejtë të kërkojnë llogari. Për inceneratorët, është përgjegjësia e institucioneve të drejtësisë të flasin për këtë çështje, në bazë të provave dhe fakteve dhe për të ndaluar abuzimet e rënda me taksat e qytetarëve. Kërkohet sa më shumë efektivitet”, tha Meta.
Sipas opozitës, ndërtimi i 3 impianteve në Elbasan, Fier dhe Tiranë është kryer në procedura të jashtëligjshme dhe korruptive duke çuar një dëm total ndaj buxhetit të shtetit në vlerën 430 milionë euro. Ish-ministri i Mjedisit, Lefter Koka është arrestuar për këtë çështje me akuzën ‘korrupsion’, ndërsa SPAK ka regjistruar një procedim penal dhe ka shpallur në kërkim ndërkombëtar 3 pronarët e kompanive përfituese të koncesionit, Stela Gugallja, Klodian Mërtiri dhe Klodian Zoton.
Discussion about this post