Pas ceremonisë mortore të Kryepeshkopit Anastas, Kryeministri Edi Rama dhe Kryeministri grek Kyriakos Mitsotakis zhvilluan një takim kokë më kokë.
Ideja e ekumenizmit, që Anastas mbrojti gjatë gjithë jetës së tij, u reflektua në atmosferën e ngrohtë të bisedës mes dy liderëve, të cilët u shfaqën pranë Patriarkut Ekumenik Bartolomeu, si dhe Kryepeshkopëve të Qipros dhe Jeruzalemit. Në përfundim, Rama i dha lamtumirën Mitsotakis me një përqafim, shkroi media greke ERT.
Megjithëse nuk u zbuluan detaje mbi temën e diskutimit, sinjalet e dhëna sugjerojnë se marrëdhëniet mes dy vendeve mbeten në një nivel pozitiv. Takimi përforcoi vizionin e Kryepeshkopit Anastas për unitetin mes besimeve, edhe në një rajon si Ballkani, ku feja ka qenë historikisht një faktor përçarës.
Mitsotakis theksoi rëndësinë e ruajtjes së një dialogu të hapur mes dy vendeve: “Sigurisht që kemi marrëdhënie të mira dhe duhet të kemi marrëdhënie të mira. Jemi vende fqinje dhe çdo çështje duhet ta zgjidhim me dialog.”
Ndërkohë, Rama e përshkroi takimin me një ton miqësor: “Ne jemi miq. Ai erdhi këtu dhe unë kisha nderin ta mikprisja. Pimë një kafe, folëm për gjëra të ndryshme dhe nuk kam çfarë të ndaj me ju. Nuk ka asnjë problem, gjithçka është në rregull.”
Discussion about this post