Rama: Fati i Ahmetaj në duart e drejtësisë, opozita turpi i vendit

Kryeministri Edi Rama u shpreh pasditen e së premtes, në atë që e quajti si komukimi publik me qytetarët, se fajësinë ose pafajësinë e Arben Ahmetajt do e vendosë drejtësia.

Ndërsa e cilësoi Ahmetajn si një nga bashkëpunëtorët e tij të afërt me të cilin ka folur shumë, Rama tha se nuk i takonte atij të shprehej nëse ai ishte ose jo i fajshëm.

E ndërsa bëri një paralelizëm mes mbrojtjes që i bëri Saimir Tahirit rreth 6 vite më parë dhe “lëshimit” të Arben Ahmetajt, përsa i takon lejes nga Kuvendi për arrestimin, Rama u shpreh se në atë kohë prokuropria ishte e papërgatitur dhe ishte nisur nga artikuj gazetash, ndërsa sot kishte paraqitur një dosje voluminoze.

“Arben Ahmetaj nuk është njeri i panjohur dhe as i largët për mua, ai është një nga bashkëpunorët me të cilët kam folur më shumë.

Nuk më takon mua nëse ai është fajtor apo i pafajshëm. Por ndryshe nga herët e tjera, Prokuroria na vuri përpara dosjen e një pune voluminoze. Ajo dosje të krijon dyshime të mjaftueshme për të mos e ndaluar arrestimin e kërkuar nga SPAK-u.

Tani është në dorën e drejtësië të na tregojë nëse është një rast fajësie, apo pafajësie”, tha Rama.

Në vijim ai shtoi se kjo nuk është as dita për të thënë dobësitë dhe të metat e punës e organeve të reja të drejtësisë, as për të shprehur shqetësimet.

“Kjo është dita për të kujtuar edhe njëherë se ajo që po ndodh me luftën kundër zyrtarëve të lartë dhe fakti që të pushtetshmit po humbasin pushtetin mbi drejtësinë, e ka zanafillën te kjo shumicë që qeveris vendin.

Te vullneti i partisë socialiste. Te këmbëngulja, te vendimmarrja më e guximshme në këto tre dekada në kërkim të një drejtësie për Shqipërinë.  Të ndërgjegjshëm për gjatësinë e kësaj rruge, për telashet me karakteret e dobëta dhe kohën që fluturon pa u mjaftuar teksa bregu në anën tjetër është ende larg. Kokën lart dhe vetëm përpara”, deklaroi ai.

Dhe natyrisht Kryeministri nuk harroi edhe një mesazh për opozitën.

“Ata që janë në një garë të ethshme për gjak derisa era e nënvedit po i mbyt nga frika e drejtësisë. i mirëpres gjylet e baltës së tyre. Ata që duhet të ishin opozita e këtij vendi, janë turpi dhe mallkimi i këtij vendi. Nuk habisin më askënd”, tha Rama.