Kryeministri britanik Rishi Sunak i është përgjigjur deklaratave të kryeministrit Edi Rama në lidhje me emigrantët e paligjshëm shqiptar në Britani. Me anë të zëdhënëses së tij, Sunak u shpreh se Britania ka një marrëdhënie të fortë me Shqipërinë dhe është mirënjohëse për punën që bën për të trajtuar kontrabandistët e njerëzve, pasi Rama tha se Britania po e bën ‘kurban’ të vendit të tij.
Rama kritikoi sot komentet nënçmuese të ministrave britanikë për rritjen e numrit të azilkërkuesve shqiptarë, duke thënë se Britania po synonte në mënyrë të rreme shqiptarët “si shkaku i krimit të saj dhe problemeve kufitare”.
“Ne kemi një marrëdhënie të fortë me partnerët tanë shqiptarë. Ne jemi mirënjohës për bashkëpunimin e qeverisë shqiptare dhe mbetemi plotësisht të përkushtuar për të punuar së bashku me ta. Ne duam të vazhdojmë të bëjmë gjithçka që mundemi me partnerët ndërkombëtarë për të thyer modelin e biznesit të kontrabandistëve të njerëzve dhe i jemi mirënjohës Shqipërisë për punën e tyre me ne për këtë,” u tha zëdhënësja gazetarëve.
Rama sulmoi hapur ministren Braverman, duke i bërë thirrje asaj të ndalojë ‘diskriminimin’ ndaj shqiptarëve për të ‘arsyetuar dështimet e politikave’. Duke shkruar në Twitter, Rama bëri thirrje për ‘respekt të ndërsjellë’ teksa goditi ‘retorikën e çmendur’ për dështimin e politikave që ka zgjedhur qeveria britanike.
Discussion about this post