Kryeministrja e Serbisë, Ana Brnabic ka reaguar pas deklaratës së kryeministrit Edi Rama në Këshillin e Sigurimit, ku bëri thirrje për njohjen e Kosovës.
Brnabic ka thënë se deklaratat e tilla s’janë të mira për sigurinë rajonale, dhe tha se vetë sekretari i OKB, Antonio Guterres, i tha se për ta Kosova nuk është shtet.
“Përgjigja më e mirë është dhënë nga Sekretari Gjeneral i OKB-së, Antonio Guterres, në fjalinë e parë që ma tha mua se Kosova nuk është shtet për ne. Kjo është përgjigja më e mirë diplomatike”, ka thënë Brnabic.
Kryeministri Rama ka kërkuar në Asamblenë e OKB njohjen e Pavarësisë së Kosovës, duke u shprehur prerë se kjo gjë duhet të përfundohet.
“Kjo Asamble e madhe nuk është dhe nuk do të jetë e plotë pa një nga shtet e rajonit tona, Republikën e Kosovës. Me keni dëgjuar më shumë sesa njëherë të bëj thirrje për njohjen e pavarësisë së Kosovës. Nuk është opsesion dhe as diçka thjesht sa për ta thënë për kauzën, është ftesë për të njohur realitetet e reja në zemër të Evropës, në Ballkanin Perëndimor ku një shtet i ri lindi me ndihmën e bashkësisë ndërkombëtare. Kjo punë duhet të përfundohet”, tha Rama.
Sipas Ramës, Kosova është një realitet që vazhdon prej 13 vitesh dhe që ka sjellë shumë paqe e stabilitet në rajon, si dhe ka kontribuar që të shkëputemi nga e shkuara e hidhur.
