Kryeministri Edi Rama ka vijuar turin e falenderimeve në Elbasan, nga ku ka ripërsëritur se vota e 14 majit nuk duhet parë që njerëzit janë të kënaqur me qeverisjen, por si një sfidë që ata I kanë bërë Partisë Socialiste.
Përtej elozheve për atë që e konsideron si një skuadër të jashtëzakonshme që punon për vendin, Rama ka kërkuar nga kryebashkiakët që të respektojnë qytetarët, dhe t’ju puthin dorën atyre që i votuan.
“Kam merak që gjithë çfarë janë, udhëheqës, të mos i gënjejë mendja se vota e 14 Majit ishte një votë kënaqësie me ne, njerëzit nuk janë të kënaqur me ne. Nuk jam unë i kënaqur, si mund të jeni ju të kënaqur?
Në mesin e mandatit të tretë është shumë për të pasur një besim kaq të madh. Njerëzit nuk janë të kënaqur nga ne, por nuk e kanë humbur besimin tek ne. Pritshmërinë që gjërat të bëhen më mirë e kanë nga PS e nga kandidatët tanë. Ky sa është nder, është dhe rrezik shumë i madh. Ne duhet të bëjmë super sforco të ju kthejmë njerëzve gjithë këtë respekt.
Ky respekt kthehet me respekt, duke e ndarë mendjen që kur të dilni nga shtëpia t’i puthni dorën çdo njeriu që ju ndalon dhe jo t’i thoni se “nuk kam kohë”. T’i hapni derën çdo njeriu që troket dhe jo të jua përplasni derën në fytyrë. Ju të mos lejoni që edhe të tjerët që përfaqësojnë institucionet të bëjnë paudhësi. Mos lejoni që një fshatari t’i vini gjobë për gardhin dhe hardhinë duke i kërkuar lekë. Ju duhet të bëheni mbrojtësit më të mëdhenj të çdo njeriu. Bëni çmos që njerëzillëkun të ja ktheni njerëzve 100 %”, tha Rama.
Ai tha se ka ardhur një pikë ku njerëzit janë të neveritur dhe të lodhur nga sherri, nga konflikti, nga mënyra se si politika i ka tërhequr zvarrë gjithë këto vite dhe në një moment të caktuar panë se zgjedhja është shumë e qartë dhe vendosën.
Discussion about this post