Në mbledhjen e parë të Qeverisë së re, Kryeministri i Shqipërisë Edi Rama shpalosi një vendim që lidhet me botën e sportit.
Rama ka theksuar se sportistët kampionë do jenë të mirë trajtuar edhe kur mos jenë në arenën sportive.
Nora Gjakova dhe Distria Krasniqi, kampionet Olimpike të Kosovës i kanë kërkuar kreut të Qeverisë së Shqipërisë që të jenë pjesë e Forcave të Armatosura të Shqipërisë, gjë e cila është aprovuar nga Rama.
“Një tjetër vendim është përfshirja në strukturat e FA të dy fitueseve të medaljeve të arta shqiptaret nga Kosova, Distria Krasniqi dhe Nora Gjakova që kanë arritur diçka që është e jashtëzakonshme dhe kanë shprehur dëshirën që i bashkohen FA të Shqipërisë. Me ministrin jemi duke punuar që me FA të krijohet një njësi speciale e kampionëve që meritojnë të trajtohen për gjithë jetën me një status të veçantë dhe në shembujt e vendeve të tjera kampionëve ua jep përfshirja në FA dhe të jenë aty shembull rrezatues dhe mentorët e të rinjve në uniformë.”-u shpreh ai.
Më tej Kryeministri shtoi se do krijohet një platformë që do jetë në mbështetje të kampionëve shqiptarë të të gjitha kategorive të sportit.
“Një akt jo vetëm simbolik, në adresë të sportistëve, kampionëve, në adresë të krenarisë kombëtare shqiptare, pavarësisht se ku janë, në Shqipëri në Kosovë apo kudo qofshin. Do krijojmë një platformë ardhmërie që do i bëjë të ndihen krenar për gjithë jetën dhe të jenë të mirë trajtuar edhe kur nuk janë më në arenën e betejave sportive”, -tha Rama.
Ndërkohë rikujtojmë se pak muaj më parë ish nën-kampioni Olimpik i Shqipërisë, Ilir Suli dha alarmin për braktisje nga shteti pavarësisht se në kohën e tij ai i kishte bërë shumë krenarë të gjithë shqiptarët./K.T/Gijotina.com
