Paralajmërimet e forta të ish kryeministrit Sali Berisha dhe ish Presidentit Ilir Meta për një fushatë të ashpër kundër qeverisë në shtator dhe protestave masive, kanë bërë që kryeministri Edi Rama të ndërpresë pushimet në jug të Shqipërisë dhe të nisë nga puna.
Rama ka thirrur sot një mbledhje me ministrat e cila pritet që të mbahet në Dajt, ku pritet të vendosen dhe prioritetet e vitit të ri politik, që këtë shtator premton të jetë i nxehtë, me opozitën që tashmë drejtohet nga dyshja Berisha-Meta.
Rama dhe ministrat pritet që të bëjnë sot një analizë të punëve të bëra dhe detyrave kryesore për vitin e ardhshëm, ku padyshim kriza në sektorin energjetik, ka qenë dhe një prej çështjeve që ka marrë vëmendjen më të madhe të qeverisë edhe në deklaratat publike.
Për këtë, para nisjes së pushimeve Rama bëri dhe ndryshime në qeveri, duke i besuar ministres përgjegjëse për linjën Belinda Balluku edhe postin e zëvendëskryeministres, duke larguar prej andej Arben Ahmetajt, i shumëpërfolur për aferën e inceneratorëve.
Nga ana tjetër, Berisha dhe Meta kanë premtuar rotacionin e pushtetit me çdo kusht, edhe pse përmendin në deklaratat e tyre vetëm zgjedhjet e lira, që të paktën sipas kalendarit të rregullt vitin e ardhshëm parashikohen që të mbahen vetëm ato lokale.
Pas 4 viteve ku të gjitha bashkitë në vend me përjashtim të Shkodrës janë drejtuar nga të zgjedhur socialistë, për shkak të bojkotit të zgjedhjeve në 2019 nga Lulzim Basha dhe Monika Kryemadhi, tashmë gara pritet që të jetë e ethshme, me Berishën e Metën që duhet të provojnë realisht forcat e tyre në terren.
Discussion about this post