Rama, “njeriu i grave” që i përdor si dekor dhe i zbyth si Belindën në Fier

Edi Rama, në këtë fushatë, po shfaqet si kampioni i grave. Flet me to, fotografohet mes tyre, u jep mikrofonin, u jep puthjen televizive dhe… u jep edhe rolin e statujës për foton e radhës.

Por çdo maskë bie, dhe një video nga takimi në Fier e rrëzoi atë që Rama përpiqet ta shesë si “bashkëqeverisje me gratë”.

Në ato pamje, shefi i Rilindjes, i rrethuar si zakonisht nga duartrokitje të organizuara, shfaqet krah Belinda Ballukut — gruaja që për vite me radhë ka qenë numri dy real i qeverisë.

Por sapo ndalon, i bën një shenjë me dorë sikur po e heq qafe dhe i hedh krahun një gruaje tjetër, duke e zbythur zëvendësen e tij si një pako të padëshiruar. Belinda mbetet në vend, me buzëqeshjen e ngrirë, si një statujë që sapo u la jashtë loje.

Jo një aksident. Jo një keqkuptim. Por një skenë simbolike, një zhveshje publike e pushtetit të dhuruar dhe një përçmim i qartë për gruan që e ka shërbyer si ushtare e bindur.

Ky nuk është vetëm një sinjal. Është manuali i vjetër i Edi Ramës: ngre, përdor, poshtëron dhe flak. Kështu bëri me Saimir Tahirin — nga “reformatori më i mirë i policisë” në të burgosur me vendim gjykate. Kështu bëri me Erion Veliajn — nga i përkëdheluri i partisë, në kryetar bashkie, e tani, i harruar në qelitë e paraburgimit të Durrësit.

Të dy i çoi drejt ferrit politik dhe më pas mbrapa hekurave. Sepse tek Rama, kush del shumë në pah, i pritet hija.

Tani është radha e Ballukut. Shumë pushtet, shumë pranë Ramës, shumë e zëshme në skenë. Edi Rama nuk i duron ata që nisin të besojnë se janë më shumë se kukulla në teatrin e tij personal. Dhe gratë? Gratë përdoren për estetikë. Për balancë fiktive gjinore. Për marketing politik. Por jo për barazi të vërtetë. Sepse asnjë lider që promovon një grua nuk e zbyth me dorë në sy të publikut për të kapur një selfie tjetër.

Pushteti që Rama jep, është një minë me sahat. Nuk vjen me kontratë. Vjen me kusht: të qëndrosh aty ku të thonë, të thuash ç’të shkruajnë, dhe të ikësh kur të urdhërojnë. Kush nuk mësohet me këtë ritëm, përfundon në ndonjë dosje, në ndonjë shkarkim pa njoftim, ose si shumë të tjerë – në ndonjë qeli.

Videoja në Fier nuk është për Belindën. Është për të gjitha gratë që besojnë se Rama është “njeriu i grave”. Jo, ai është njeriu që i përdor, i konsumon dhe pastaj i poshtëron. Dhe këtë radhë, nuk mund ta mbulojë as me DJ, as me dajre, e as me buzëqeshje false.