Avokat Spartak Ngjela e ka quajtur Ballkanin e Hapur si një tezë antishqiptare dhe për këtë ai i ka bërë thirrje kryeministrit Rama të reflektojë sa është në kohë. Përmes një postimi në Facebook, duke marrë shkas dhe nga ndodhitë e fundi mes Kosovës dhe Serbisë, ai shprehet se kryeministri Rama duhet t’i qëndrojë në krah Kosovës, të pranojë politikën e saj dhe jo t’i rrah shpatullat Aleksandër Vuçiç.
Sipas Ngjelës, nëse Rama vazhdon me teorinë e Ballkanit të Hapur duke bashkëpunuar me Kosovën, atëherë më mirë të jap dorëheqjen sepse nuk do jetë më kryeministër i denjë për shqiptarët.
“Ballkani i Hapur, u provua që është një tezë antishqiptare.
A do ta japë dorëheqjen Kryeministri Edi Rama? Nëse kryeministrin e Shqipërisë, nuk e pranon politika e Lartë e Kosovës: Presidenti i Republikës ose Kryeministri i Kosovës – Kryeministri i Shqipërisë duhet të japë dorëheqjen.
Përse do ta duan shqiptarët një kryeministër të tillë! Ja çfarë ndodhi kohët e fundit: Rama kërkoi të na hapte kufijtë për një Ballkan të Hapur, ku do të miqësoheshin popujt e Gadishullit, kurse banditi Vuçiç ka çuar forcat ushtarake në kufirin verior të Kosovës.
Dhe Rama, do të na qëndrojë ende si kryeministër!? Përse ta duam! që të na hapë kufirin për trupat ushtarake serbe të drejtuara nga terroristi milosheviçian Aleksandër Vuçiç?”, shkruan ai.
Sipas avokatit, me planin e Ballkanit të Hapur Rama po tregon qëllimet e tij antishqiptare dhe është një turp i madh për të dy vendet
“Një turp i madh për të gjithë politikën shqiptare është batakçillëku antishqiptar i Edi Ramës për Ballkanin e Hapur.
Po ky kryeministër, këtë turp historik në bashkëpunim me terroristin e Serbisë, e ka bërë me qëllim antishqiptar, apo nga naiviteti politik?
Dhe ja përgjigjja e kësaj pyetjeje: po të japë dorëheqjen, Edi Rana e njeh gabimin si paaftësi në kuptueshmërinë e termit “Ballkan i Hapur”; kurse, po nuk e jep dorëheqjen si kryeministër, ai është në bashkëpunim me agresionin serb antishqiptar.
Këtë do ta shohim…
Pyetja që ngritëm më lart, nuk ka asnjë zgjidhje tjetër veç dy mundësive që përcaktuam.”, shkruan ai.
Sakaq, Ngjela e sheh si jo normal faktin që opozita nuk po reagon për çfarë po ndodh.
