Kryeministri i Shqipërisë, Edi Rama gjatë vizitës një ditore që po zhvillon në Kosovë ka takuar kryeministrin Albin Kurti dhe udhëheqës të partive opozitare. Sipas axhendës, Rama nuk do të takohet me kryetarin e Kuvendit, Glauk Konjufca dhe presidenten Vjosa Osmani.
Sipas Zyrës së Kryeparlamentarit Konjufca, kur po parashikohej vizita e Ramës, ai kishte në plan një vizitë zyrtare në Slloveni, por tensionet në veri të vendit ishin arsyet e anulimit të vizitës.
“Kur jemi kontaktuar nga kabineti i zotit Edi Rama, në axhendë kemi pasur një konferencë në Bërdo, mirëpo kryetari e ka anuluar konferencën për shkak të situatës në veri. Kjo është arsyeja”, tha për Telegrafin, Ilir Kërçeli, këshilltar i kryeparlamentarit Konjufca.
Më herët kryeministri Edi Rama zhvilloi një konferencë të përbashkët me homologun Albin Kurti ku ndër të tjera komentuan situatën në veri dhe raportin me Serbinë.
