Rama nuk tërhiqet: ‘Tik Tok’ do të mbyllet në Shqipëri brenda 6-8 javësh

Kryeministri Edi Rama ka folur përsëri për mbylljen e Tik Tok duke e bërë të qartë se nuk do të tërhiqen nga vendimi për mbylljen e platformës sociale.

“Për ‘TikTok’, ne nuk lëvizim nga vendimi që kemi marrë dhe siç kemi paralajmëruar është një vendim që për implementimin e të cilit do të na duhet 6-8 javë sepse teknologjikisht është shumë e rëndësishme kjo kohë”, tha Rama.

Kreu i qeverisë nuk dëgjon sugjerimet për vendosjen e filtrave ndaj Tik Tok, njësoj siç veprojnë shumë shtete të Bashkimit Europian, por vazhdon me “kokëfortësi” vendimet e tij radikale.

Ndërkohë opozita e ka kundërshtuar vendimin për mbylljen e ‘Tik Tok’ të cilën e konsideron si mungesë lirie dhe shtypje të mediave sociale në vendin tonë.