Kryeministri Edi Rama ka reaguar për herë të parë pas zgjedhjeve të pjesshme vendore, ku PS fitoi 5 nga 6 bashkitë që ishin në garë. Në Facebook, Rama pranon humbjen për Shkodrën, që deri më tani kryesohet nga Bardh Spahia i “Shtëpisë së Lirisë”, ndërsa shton se PS arriti objektivin që kishte.
“Zgjedhjet e djeshme i dhanë Partisë Socialiste as më shumë e as më pak se sa prisnim. 5 nga 6 bashkitë në garë – me një fushatë pa i ndezur motorët e qendrës dhe me një hendek votash nga rivalët edhe më të madh se sa tregonin projeksionet tona. Urime fituesve dhe faleminderit të gjithë atyre që u angazhuan për këtë rezultat, po mbi të gjitha faleminderit zgjedhësve, të cilët dje ushtruan pushtetin e tyre vendimmarrës në interes të komunitetit”, shkruan Rama.
Ndër të tjera, Rama përmend situatën e rëndë në Ukrainë për shkak të agresionit rus, ku shton se e rëndësishme për momentin është mirëqeverisja e bashkive që PS ka fituar.
“Thënë kjo, nuk rri dot pa shtuar sot se ajo që po ndodh në më pak se dy orë vijë ajrore nga Shqipëria, e bën të pamundur shijen legjitime të kësaj fitoreje. Sa hap e mbyll sytë bota ku jetonim ka rindryshuar përsëri. Por ndryshe nga ndryshimi i përkohshëm që na ka imponuar pandemia, ky rindryshim duket se nuk do të jetë aq i përkohshëm. Lufta po vret e po shkatërron në Ukrainë, por po i fut kthetrat e ndikimit të saj kudo, në tregjet e mëdha e të vogla, ku jeta e përditshme po shtrenjtohet orë e minutë nën bombat e pasigurisë që lufta mbjell kudo. Sa hap e mbyll sytë filmat me Luftën e Tretë Botërore, armët atomike, shkretimin e vendbanimeve, ia kanë lënë vendin realitetit të jetës sonë, ku duket sikur s’ka më asnjë çmenduri të pamundur dhe sikur as vetë fundi i botës, nuk mund të përjashtohet si një nga skenarët e mundshëm. Ndërkohë ne kemi fituar Dibrën, Durrësin, Lushnjën, Vorën e Rrogozhinën, me rezultate përtej parashikimeve më optimiste! Por sot lartësia e sfidës është ku e ku më shumë marramendëse, se sa mirëqeverisja e këtyre bashkive dhe se sa të gjitha sfidat qeverisëse deri fare pak ditë më parë”, shtoi ai.
Partia Socialiste arrite të fitonte bashkisë e Vorës, Rrogozhinës, Durrësit, Dibrën dhe Lushnjen, ndërsa Shkodra kryesohet nga Shtëpia e Lirisë, që ndiqet nga PD si forcë e tretë politike dhe pa asnjë fitore.
Discussion about this post