Nënkryetarja e Partisë Demokratike, Jorida Tabaku ka reaguar pasi kryeministri Edi Rama prezantoi paketën e rezistencës sociale për rritjen e çmimeve, duke e konsideruar si fasadë.
Tabaku shkruan në Facebook se 60% e çmimit të naftës janë taksa që shkojnë për oligarkët dhe jo qytetarët. Sipas saj, 20 mln euro që qeveria merr në muaj nga taksa e karburantit, i merr për t’ia dhënë inceneratorëve dhe PPP-ve të tjera.
“Fasada e ndihmës Ramës! Qytetarët kanë ditë që janë ngritur në protestë për çmimet abuzive të naftës që kanë ndikuar në çmimet e tjera. Inflacioni po prek nivele të pamenduara! Pse është rritur çmimi naftës? Pasi 60% e çmimit të naftës janë taksa që shkojnë për oligarkët dhe jo qytetarët. Për ti hedhur hi syve të qytetarëve dhe për ti gënjyer ka nxjerrë një paketë qesharake si ajo e pandemisë. Në një muaj qeveria përfiton 20 mln euro nga taksa e karburantit që fare mirë mund ti shkonte shqiptarëve dhe xhepave të tyre. Por 20 mln qeveria i merr për t’ia dhënë inceneratorëve dhe PPP-ve të tjera”, shkruan Tabaku.
Sipas deputetes demokrate, kjo situatë zgjidhet duke ndërhyrë në politikat e taksave, ndërsa bëri thirrje që buxheti i shtetit të mos trajtohet si plaçka e luftës së oligarkisë.
Discussion about this post