Kryeministri Edi Rama ka shpërndarë ditën e sotme pamje nga shkolla “Mehmet Babamusta”, e cila është rindërtuar pas shembjes nga tërmeti i 26 nëntorit.
Përmes videos të postuar në Facebook, Rama bën më dije se janë 378 nxënës që do mësojnë në atë shkollë, të cilën ai e konsideron për nga kushtet, si ndër më të mirat në Europë.
“Edhe shkolla “Mehmet Babamusta” në Kavajë ka rilindur pas tërmetit si shëmbëlltyrë e ambicies tonë për arsimin që duam për fëmijët tanë. 378 nxënës do të mësojnë në këto hapësira dinjitoze pa asnjë dallim nga shkollat më të mira europiane”, shkruan Rama.
Më herët, kryeministri publikoi një video me pamjet e vizitës së tij në Akademinë Ushtarake “West Point”, teka ndodhet në New York. Rama ndodhet në SHBA ku pritet të marrë pjesë në një takim të organizuar nga Asambleja e Përgjithshme e Organizatës për Kombet e Bashkuara me temë “Kuptimi i Paqes dhe Qëndrueshmërisë në shekullin e 21-të”.
