Kryeministri Edi Rama ka qenë i pranishëm në konferencën e OKB mbi ndryshimet klimatike COP26, mbajtur në Glasgou, Skoci.
Gjatë fjalës së tij, Rama u shpreh se është krenar që Shqipëria nuk është vend ndotës dhe që prodhimi ynë i energjisë mbështetet te burimet e ripërtëritshme që janë 100 për qind hidrike.
“Ndoshta jam më i gjati këtu, por vij nga një prej vendeve më të vogla, Shqipëria. Në mbledhje të tilla ne na thonë se çfarë të bëjmë, të dëgjojmë e të mbajmë shënim. Por ende nuk mora përgjigje për pyetjen që kisha para se të vija këtu. Si kanë ndërmend të na ndihmojnë ndotësit e mëdhenj neve, një vend jondotës. Po, po, një vend jondotës. Prodhimi ynë i energjisë bazohet 100% në energji hidrike, 100% të rinovueshme. Mund t’i kishim pranuar të gjitha ofertat për termocentrale për të kompensuar nevojat në muajt e thatësirës. Kështu që vendi im pyet, mos po paguajmë për shkak se po bëjmë gjënë e duhur?”, u shpreh kryeministri.
Rama tha se Shqipëria ka nevojë për para për të përballuar krizën energjetike, por në mënyrë zbukuruar, i kërkoi fuqive ndërkombëtare që financimet t’i vijnë në formë e granteve, dhe jo në borxhe.
“Besoj se do të marrim financime për të luftuar këtë ngërç. Këto financime nuk duhet të vijnë në formën e huave, që do të na fusin në një spirale borxhesh, por në formën e granteve, që do të na fuqizojnë për të investuar”, tha Rama.
Gjatë samitit të Klimës, kryeministri Rama ka takuar figura të rëndësishme të politikës botërore si kryeministri britanik Boris Johnson, apo ish-kancelarja gjermane, Angela Merkel.
