Kryeministri Edi Rama iu rikthye sulmeve ndaj Albin Kurtit këtë të enjte, gjatë një fjalimi të mbajtur në Bashkinë Tiranë me rastin e ceremonisë së dhënies së titullit “Qytetar Nderi i Tiranës” – Ali Ahmetit, nga Këshilli Bashkiak i kryeqytetit.
Edhe pse nuk e përmendi Kurtin nominalisht, Rama foli për “ndërhyrje në fushatën elektorale në Maqedoninë e Veriut”, gjë për të cilin vetë Ali Ahmeti ka akuzuar kryeministrin e Kosovës.
Pasi foli me superlativa për kreun e BDI-së, Rama shtoi se “nuk dua në asnjë mënyrë, që një shprehje e plotë e opinionit tim sot, të lexohet si ndërhyrje në fushatën zgjedhore të vendit fqinj, ku ne nuk kemi asnjë qëllim që të ndikojmë në vendimmarrjen e zgjedhësve të atij vendi”.
“Qoftë edhe të shqiptarëve, të cilëve u them që vetëm të shohin interesit e Republikës së Maqedonisë së Veriut, që sot është më shumë se kurrë, edhe e tyrja, krah për krah me bashkëqytetarët e tyre maqedonas, e të gjitha minoritetet që jetojnë atje, e ta mbrojnë republikën e tyre ashtu si edhe pozicionin e tyre si shqiptarë nga ndikime të jashtme, që synojnë gjërat që nuk kanë asnjë lloj lidhje me stabilitetin dhe mirëqenien e shtetit fqinj, e që në asnjë rast, nuk mund tu sjellin shqiptarëve asgjë më të mirë se çfarë kanë arritur, por mund tu sjellin atyre dëme mbi atë se çfarë kanë arritur”, vazhdoi ai.
“Ali Ahmetit pa diskutim mund t’i bëhen kritika plot brenda vendit, është e drejta dhe detyra e kujtdo që është në opozitë, më shumë nga kushdo që është në pushtet, edhe pse Ali Ahmeti nuk është ulur kurrë në një karrige zyre, përveç atij kolltuku të vjetër të selisë së partisë së tij, pa dyshim që i takojnë atij në radhë të parë sulmet dhe kritikat jashtë rreshtave të partisë së shumicës shqiptare që ai udhëheq.
Por, ka një gjë që nuk e luan dot as topi, kur themi në shqiptarë, që është se historia do ta thotë me zë edhe më të fortë se sa kushdo sot dhe që është se, atë që ka bërë Ali Ahmeti me pushtetin, për përparimin e të drejtave të shqiptarëve në shtetin fqinj dhe për ngritjen lartë të shqiptarëve në sytë e krejt botës, të gjithë ne të tjerët nuk mund ta diskutojmë, por vetëm duhet ta pranojmë dhe nëse jemi të mençur, ta marrim si një mësim, nga një shqiptar nga më të mirët”, shtoi Rama.
Gjatë fushatës së fundit elektorale në Maqedoninë e Veriut, Kurti mbështeti opozitën, ndërsa BDI e drejtua nga Ali Ahmeti u reshtua krah qeverisë.
Discussion about this post