Kryeministri Rama, në fjalën e tij të mbajtur në Asamblenë e Partisë Socialiste, u ndal edhe te drejtësia, për të cilën tha se është prova më e egër e zjarrit për socialistët në shërbim të gjeneratës tjetër.
Më tej, Rama deklaroi se PS i ka hapur një shteg të ri drejtësisë dhe mbështet pa kushte dhe pa luhatje gjyqtarët dhe prokurorët.
Kryeministri u shpreh se drejtësia ka dhe prokurorë apo gjykatës që ndonjëherë kanë mungesë integriteti ulëritëse, duke u ndalur te rastet e gjyqtarëve dhe prokurorëve të përfshirë në ndërtime pa leje në vend. Këto raste të cilat kryeministri i quajti emblematike.
“Nga rënia e atyre mes nesh në mëkatin e përfitimit të paligjshëm, ne do të durojmë. Do të durojmë dhe kur dhimbjet vijnë nga helmi i atyre që na akuzojnë se e kemi kapur drejtësinë. Kjo e drejtësisë është prova më e egër e zjarrit e PS-së në shërbim të gjeneratës tjetër. Forca jonë i ka hapur një shteg të ri drejtësisë. PS thotë atë që bën dhe bën atë që thotë në mbështetjen pa kushte dhe pa luhatje në mbrojtje të gjyqtarëve dhe prokurorëve. Nuk jemi lëkundur, nuk do të lëkundemi as sot përtej faktit se pushteti i ri i drejtësisë shfaq shenja sëmundjesh, që dëmtojnë organizmin e vendit. Drejtësia mban ende prokurorë dhe gjykatës dritëshkurtër dhe mendjengushtë, ndonjëherë me mungesë ulëritëse integriteti.
Disa prokurorë dhe gjykatës i kanë rënë ndesh, duke mbajtur anën e zaptuesve të hapësirës publike, është emblematike”, tha Rama.
Rama theksoi gjatë fjalës së tij se GJKKO nuk po del ende nga hija e SPAK-ut duke shtuar se “ato dy institucione na kanë dhënë publikisht në më shumë se një rast edhe arsye për tu habitur por edhe arsye për tu shqetësuar shumë seriozisht”.
“Dhe në këtë pikë e vërteta e madhe është se nuk bëjnë përjashtim as vetë SPAK, krenaria e vetme deri më sot e zbatimit të reformës në Drejtësi dhe as GJKKO, jo se jo, e cila nuk po del ende nga hija e SPAK-ut, edhe ato dy institucione na dhënë publikisht në më shumë se një rast edhe arsye për tu habitur por edhe arsye për tu shqetësuar shumë seriozisht.
Mosrespektimi i prezumimit të pafajësisë, intimidimi i personave të ashtuquajtur në dijeni, paraburgimi si presion publik e juridik, nxjerrja e të dhënave hetimore rrugëve me qëllim për të linçuar në Pazar fatin e personave të hetuar, marrja forcërisht e rolit të institucionit tjetër ligjzbatues nga prokurorë, apo dalja e gjykatësve nga roli i garancisë së barazisë para ligjit, për të marrë rolin e noterit të prokurorëve ose të superprokurorit janë shenjat e sëmundjeve të trashëguara nga trupi i kalbur i drejtësisë së vjetër 100 e ca vjeçare, tek organizmi fëminor i drejtësisë së re 7 vjeçare.
Por kujdes, kura për këto sëmundje nuk është kthimi kurrsesi mbrapa nga pavarësimi i drejtësisë, në asnjë mënyr”, shtoi ai.
Discussion about this post