Pas takimit me kryeministrin Edi Rama, fermerët dolën para mediave ku treguan më shumë detaje nga takimi. Një prej përfaqësuesve të tyre, tha se kryeministri iu kishte dhënë të drejtë, por ishte justifikuar duke thënë se kjo është situata për momentin dhe nuk iu kishte ofruar zgjidhje.
“E falenderojmë që na priti. Nuk e konsiderojmë çështje të zgjidhur. Na tha po kemi të drejtë. Për momentin na tha kjo është situata. Ne me shifra nuk marrim vesh se jemi fermerë, por shohim që jemi në falimentim. Ne akuzohemi sikur jemi kriminela, ne jemi punëtorë. Ne prodhojmë për popullin. Po kështu siç jemi ne po dorëzohemi, prandaj kërkoj që subvencionimi të vijë tek fermeri. Duhet të na përkrahin, jo të na ofendojnë. Rama tha që do takohemi në vazhdim për një takim më formal”, thanë fermerët.
Gjithashtu, një tjetër fermer i pranishën në takim, tha se Rama ishte i painformuar për situatën, por kishin rënë dakord që cilësia e produkteve bujqësore është e pagarantuar.
“Ne pranuam këtë takim të rastësishëm duke përfituar nga rasti, Rama është i painformuar dhe diskutuam për heqjen e 6 %, e cila në buxhetin e shtetit është vlerësuar 9 milionë dollarë por është 5 fish më shumë. Ne mendojmë që qeveria nuk e njeh gjendjen reale të fermerëve. Fermerët janë në rrezik dhe nuk kanë porositur për sezonin e ardhshëm për shkak të vështirësive. Ramë dakord që cilësia e inputeve bujqësore është e pagarantuar, nëse ata marrin në konsideratë propozimet tona do të arrijmë diçka”, tha ai.
Një përfaqësues tjetër, deklaroi se në takim ka qenë dhe ministrja e Bujqësisë, Frida krifca.
Discussion about this post