Në një kohë kur vendi po digjet nga zjarret, një raport i fundit i Bankës Botërore shërben si një goditje ndaj propagandës së qeverisë, duke nxjerrë në pah se Shqipëria është një nga vendet më të ekspozuara ndaj fatkeqësive natyrore në Europë, sidomos zjarreve.
Raporti shkencor shfaq një realitet tjetër nga ai që shfaqet nga zyrtarët qeveritarë. Ai thekson se 95% e bashkive shqiptare janë prekur nga zjarret në dy dekadat e fundit. Kjo e dhënë tregon se ky nuk është një problem i momentit, por një kërcënim i vazhdueshëm dhe i neglizhuar. Në periudhën 1995-2015, janë regjistruar 900 raste me dëme që shkojnë në 134 mijë euro.
Bashkitë në rrezik, paralajmërimi për të ardhmen
Banka Botërore ka identifikuar bashkitë me rrezikshmërinë më të lartë, si Puka, Fushë Arrëzi, Mirdita, Himara, Delvina, Malësia e Madhe, Pusteci, Kukësi, Finiqi dhe Memaliaj. Shumica e tyre vlerësohen me një indeks rreziku prej 3 ose më shumë, ku shifra maksimale është 6. Kjo konfirmon se zonat malore dhe bregdetare, të pasura me pyje, janë pikat më të cenueshme.
Raporti bën një parashikim shqetësues për të ardhmen: deri në vitin 2050, reshjet vjetore pritet të bien me 8.5%, ndërsa intensiteti i periudhave të thata dhe i reshjeve ekstreme do të rritet. Kjo do të thellojë rrezikun e zjarreve, si dhe do të sjellë dëme të mëdha në bujqësi dhe infrastrukturë. Konkluzioni i raportit është një paralajmërim i fortë për autoritetet, që të investojnë seriozisht në mbrojtjen civile dhe të ndërtojnë një strategji të qëndrueshme ndaj fatkeqësive natyrore.
Discussion about this post