Deputeti i Partisë Demokratike, Dashnor Sula ka reaguar në lidhje me të dhënat e INSTAT që tregojnë se të rinjtë po largohen në shumicë nga vendi dhe në Shqipëri po mbesin vetëm mosha e tretë dhe e mesme.
Përmes një mesazhi në Facebook, Sula bën fajtor Ramën për emigrimin masiv, duke thënë se po i vret shpresën të rinjve, ndërsa shton se në mënyrë indirekte fajin e kanë dhe demokratët që përplasen me njëri-tjetrin.
“Çdo ditë e më shumë grupmosha më vitale, ata që janë e ardhmja e vendit po bëhet gjithnjë e më e vogël. Në Shqipëri po mbesin vetëm mosha e mesme dhe mosha e tretë. Edi Rama po e çon deri në fund planin e tij për të “vrarë” shpresën. Në mënyrë indirekte një dorë për të realizuar ëndrrën e tij po e japim edhe ne demokratët duke u marrë me njëri-tjetrin. INSTAT raportoi së fundmi se popullsia e Shqipërisë më 1 Janar 2022 rezulton 2.793.592 banorë, duke pësuar një rënie me 1,3 %, krahasuar me 1 janar 2021. Ky është viti i pestë radhazi me tkurrje të numrit të banorëve. Në total, në vend kishte 36 mijë banorë më pak në Janar të vitit 2022, në krahasim me të njëjtin muaj të një viti më parë”, shkruan Sula.
Sula shton se zhvillimi më shqetësues është fakti që në pjesën më të madhe të kësaj tkurrjeje ka ndikuar rënia e numrit të grup-moshës 20-24 vjeç, që është dhe pjesa më vitale dhe në moshë produktive e popullsisë.
Discussion about this post