Komisioni Evropian, këtë të martë, ka prezantuar Raportet e Progresit për vendet e zgjerimit, ku përfshihet edhe Kosova.
Sipas këtij raporti, përsa i përket dialogut me Serbinë, Kosova duhet të angazhohet në mënyrë konstruktive dhe të bëjë përpjekje të tjera substanciale në “zbatimin e të gjitha marrëveshjeve të kaluara” të arritura në kuadër të dialogut me Serbinë dhe të “kontribuojë në arritjen e një marrëveshjeje gjithëpërfshirëse, ligjërisht të obligueshme për normalizimin e marrëdhënieve me Serbinë”, tha Komisioni Evropian në Raportin e Progresit.
Gjithashtu, në raport theksohet se marrëveshja gjithëpërfshirëse me Serbinë, është vendimtare në mënyrë që të dy vendet të përparojnë në rrugën drejt Evropës.
“Kosova pritet të angazhohet në mënyrë konstruktive në negociatat mbi marrëveshjen e normalizimit ligjërisht të detyrueshme në periudhën e ardhshme, në mënyrë që të bëjë përparim të shpejtë dhe konkret. Arritja e një marrëveshjeje gjithëpërfshirëse, ligjërisht detyruese është urgjente dhe vendimtare në mënyrë që Serbia dhe Kosova të përparojnë në rrugët e tyre përkatëse evropiane”.
KE publikon këtë raport një herë në vit dhe tregon situatën në të gjitha fushat kryesore, ku reformat janë të nevojshme që këto vende të përparojnë në procesin e integrimit evropian. Progresi në këtë fushë është vendimtar për secilin vend për të bërë përparim në procesin e pranimit. Këto raporte pritet të miratohen të martën nga Kolegji i Komisionerëve dhe të prezantohen para deputetëve të Parlamentit Evropian, nga Oliver Varhelyi, komisionari për zgjerim i BE-së
