Grupet e organizuara kriminale nga Serbia kanë depërtuar në një treg të ri fitimprurës të drogës – Rusinë, nga ku po zgjerojnë rrjetin e tyre të tregtarëve në vendet fqinje, sipas raportit të fundit të Agjencisë së Kombeve të Bashkuara për Drogën dhe Krimet për vitin 2023.
Në raportin e UNODC (Agjencia e Kombeve të Bashkuara për Drogën dhe Krimet) mbi tregtinë e kokainës në botë, në të cilin Serbia dhe serbët përmenden deri në 16 herë, një kapitull i kushtohet zhvillimit të një tregu të ri, por shumë fitimprurës – Federatës Ruse, raporton nova.rs.
Ndërsa më parë në atë vend kishte pak kokainë dhe rezervohej vetëm për elitën, kjo lloj droge filloi të përhapej edhe në shtresa të tjera.
Kokaina është më e shtrenjtë në Rusi sesa në shumicën e vendeve të Evropës Perëndimore, por oferta e shtuar ka dërguar në një rënie të çmimeve, kështu që “pluhuri i bardhë” tani është gjithnjë e më i përballueshëm.
Ndërsa më parë kokaina ishte e pranishme në qendrat më të mëdha dhe më të pasura – Moskë, Shën Petersburg dhe Yekaterinburg, tani ajo është përhapur në qytete të tjera më të vogla.
Dy rrugë të arritjes së drogës në Rusi
Sipas raporteve të Kombeve të Bashkuara, kokaina arrin në Rusi nga dy drejtime. Njëra është Evropa Perëndimore dhe transporti organizohet kryesisht nga grupe serbo-malazeze, por edhe nga shqiptarët që veprojnë tërthorazi – kur i porosit dikush, e sjellin mallin.
Qendra e shpërndarjes është Lituania, përmes së cilës kokaina shkon në Rusi.
Rruga e dytë, më serioze është ajo “thjesht serbe”, e cila është rruga e modifikuar ballkanike. Kokaina vjen në portet greke dhe turke, si dhe ato rumune dhe bullgare. Nga atje transportohet në Evropën Perëndimore “nga dera e pasme”, por gjithnjë e më shumë edhe në Rusi. Sasia e kokainës së kapur në Rumani dhe Bullgari është vazhdimisht në rritje, por edhe numri i përdoruesve.
Se kriminelët nga këto zona janë të pranishëm në atë pjesë të Evropës, tregon edhe tentativa për vrasjen e liderit të klanit Kavaka, Radoj Zvider, në Kiev në maj të vitit 2020, kur u qëllua nga anëtarët e klanit rival Skaljar.
Gjithashtu, një tjetër informacion interesant tregon për këtë.
Gjegjësisht, në muajin mars të vitit 2019, autoritetet rumune u shtangën kur filluan të gjenin “tulla” me kokainë të pastër në brigjet e Detit të Zi. Doli se ishte pjesë e transportit të një sasie të madhe kokaine dhe gjithçka shkoi keq për tregtarët, kur varka, e cila përdorej për transportimin e kokainës nga anija në bregun ku prisnin kamionët, u përmbys. Dy shoferët e kamionit, Tode Krstiq dhe Nemanja Cvetkoviq nga Vranjanci, secili është dënuar me 9 vjet e 4 muaj burg për përfshirje në kontrabandë droge.
Gjithashtu, siç thuhet në raport, në vitin 2011, një grup i organizuar kriminal i përfshirë në kontrabandën e kokainës ishte shkatërruar në Shën Petersburg. Drejtohej nga një serb, i cili jetonte prej kohësh në Ekuador dhe më pas policia sekuestroi, sipas standardeve të sotme, një sasi të vogël “vetëm” 4.5 kilogramë kokainë.
Lufta pengoi pushtimin e tregut
E vetmja gjë që pengoi “pushtimin” e tregut rus nga kartelet e drogës serbo-malazeze ishte lufta që shpërtheu kur Rusia pushtoi Ukrainën. Të dyja vendet ishin një treg i hapur për kokainën dhe fitimin e shumave të mëdha parash, por tani transporti i drogës është më i vështirë, sepse edhe Deti i Zi është bërë zonë lufte, por edhe për shkak të sanksioneve të vendeve të Bashkimit Evropian, transporti i mallrave është më i vogël, kështu që kontrolli është më i rreptë. Megjithatë, ka gjasa që kriminelët e Ballkanit t’i përshtaten kushteve të reja, ashtu siç u përshtatën me kohën e koronës, kur kontrabanda dhe konsumi i kokainës jo vetëm që nuk u ul, por u rrit.
Raporti i UNODC-së konfirmoi atë që tashmë ishte spekuluar, se kriminelët serbë fituan një avantazh në tregtinë e kokainës falë faktit se ata kishin kontakte të drejtpërdrejta me prodhuesit, kryesisht në Peru.
Organizatat kriminale nga tre vende evropiane kanë kontakte të tilla direkte: Italia, Belgjika dhe Serbia.
Në këtë kuadër përmendet edhe një organizatë e njohur kriminale “Group America”, e cila meritonte të përmendej në raportin e Kombeve të Bashkuara për helmimin me kokainë. Përmendet gjithashtu se autoritetet peruane arrestuan një “anëtar të rangut të lartë” në vitin 2016 – Zoran Jaksiq.
Ndërkohë që më parë prodhuesit peruan të kokainës i shisnin mallrat e tyre kryesisht karteleve kolumbiane dhe meksikane, tani një pjesë e madhe e drogës, në masë të madhe falë kriminelëve serbo-malazez, shkon në Evropë./Telegrafi
Discussion about this post