Partia Demokratike ka reaguar sërish për raportin e “Transparency International” që deklaronte se korrupsioni në vend po thellohet.
Deputeti i PD, Arbi Agalliu deklaron se lufta kundër korrupsionit është interes kombëtar dhe se PD është e vendosur t’i japë fund pandëshkueshmërisë për një të ardhme më të mirë. Sipas tij, fajtor për gjetjet në këtë raport është kryeministri Rama, të cilin e cilëson si një armik të mirëqenies së qytetarëve të vend.
“Korrupsioni, si armiku i mirëqenies së shqiptarëve, e ka kthyer Shqipërinë në një vend të pajetueshëm.
Përgjegjësi i kësaj gjendje, i ngecjes së Shqipërisë në vendnumëro nën morsën e korrupsionit, është pushteti absolut dhe antidemokratik i Edi Ramës, i cili mban i vetëm frerët e një qeverie që tregohet me gisht në raportet ndërkombëtare dhe në ato të organizatave prestigjioze si më e korruptuara në Europë”, shprehet Agalliu.
Për deputetin demokrat, një nga shembujt më flagrant të korrupsionit qeveritar, është afera e inceneratorëve, për të cilën qytetarët vijojnë të paguajnë me taksat e tyre pronarët në kërkim ndërkombëtar të impianteve, që sot janë skenë krimi.
Discussion about this post