Një raport i pavarur në Policinë Metropolitane (Met) i porositur pas vrasjes së Sarah Everard ka arritur në përfundimin se forca më e madhe e Britanisë është “thyer” dhe duhet të shfuqizohet nëse nuk mund të ndryshojë.
Met është ‘institucionalisht raciste, homofobe dhe mizogjene’, thuhet në raport.
Duke njohur nivelet e mëdha të shqetësimit publik pas rrëmbimit, përdhunimit dhe vrasjes së Sarah Everard nga një oficer në shërbim të Met dhe incidente të tjera thellësisht shqetësuese, Met caktoi baroneshën Louise Casey për të udhëhequr një rishikim të pavarur të kulturës dhe standardeve të sjelljes së saj.
Gjatë shqyrtimit të saj, një tjetër oficer i Met, David Carrick, u dënua për një sërë përdhunimesh, ofendimesh seksuale dhe torturash ndaj grave.
Rishikimi filloi në shkurt 2022 dhe përfundoi në mars 2023, kur u publikuan raporti përfundimtar dhe rekomandimet. Rishikimi diskuton nëse udhëheqja, rekrutimi, verifikimi, trajnimi, kultura dhe komunikimi i Met-it mbështesin standardet që duhet të presë publiku.
Ai rekomandon se si standardet e larta mund të përmbushen në mënyrë të përditshme dhe se si mund të rikthehen dhe ruhen nivelet e larta të besimit të publikut në Met.
Raporti prej 363 faqesh zbuloi shumë incidente tronditëse, duke përfshirë një oficere të Policisë së Met që u “zhvesh me forcë” nga një oficer mashkull në një makinë patrullimi dhe u detyrua të ulej në prehrin e tij. Forca, thotë ajo, nuk ka arritur të mbrojë publikun nga oficerët që abuzojnë me gratë. Londinezët janë “vënë të fundit” dhe qyteti “nuk ka më një shërbim policor funksional në lagje”.
Raporti zbuloi pretendimet e përdhunuesve dhe pedofilëve që i shpëtonin drejtësisë pasi një frigorifer i mbushur me prova mjeko-ligjore u mbinxeh verën e kaluar, duke shkatërruar mostrat. Thuhet se ftohësit u mbajtën të mbyllura me litarë bungee dhe oficerët kontaminuan mostrat duke mbajtur drekën e tyre në një, thuhet në raport.
Casey tha: “Është simbolike e një organizate që ka humbur rrugën e saj.”
Në raste të tjera tronditëse, një oficer musliman tregoi se si kolegët e tij lanë proshutë në këpucët e tij, ndërsa një oficer tjetër tha se atyre iu tha të fshinin mesazhet e WhatsApp që tregonin keqbërje gjatë takimeve me oficerë të lartë.
Duke komentuar raportin, kryebashkiaku i Londrës Sadiq Khan tha: “Dëshmitë janë shqetësuese. Baronesha Kejsi ka gjetur racizëm institucional, mizogjini dhe homofobi”.
Udhëheqësi kryesor i opozitës, Sir Keir Starmer fajësoi qeverinë dhe tha se forcat policore do t’i nënshtrohen një reforme nën një qeveri laburiste.
“Për 13 vjet ka pasur një boshllëk të udhëheqjes nga Ministria e Brendshme, e cila ka parë që policia e Britanisë të bjerë shumë më poshtë standardeve që publiku ka të drejtë të presë. Shkalla e ndryshimit të kërkuar është e madhe. Por mësimet që pashë nga reforma policore në Irlandën e Veriut tregojnë se ajo mund të bëhet.”
Sekretarja e Brendshme Suella Braverman tha: “Ka shumë më tepër për të bërë për të larguar oficerët e papërshtatshëm. Ky raport besoj se konfirmon që do të dalin në dritë raste të tjera të papranueshme”.
Një total prej 1,483 akuzash për dhunë u raportuan kundër 1,539 oficerëve të policisë në Angli dhe Uells gjatë një periudhe prej gjashtë muajsh, sipas një të dhënë të fundit të publikuar nga Këshilli Kombëtar i Shefave të Policisë.
Vetëm 13 oficerë dhe staf u shkarkuan për sjellje të pahijshme dhe askush nuk u pushua nga puna si rezultat i ankesave publike.
Raporti, i cili është i pari i këtij lloji, është mbledhur së bashku me të dhënat e mbledhura midis tetorit 2021 dhe marsit 2022. Vlerësimet e mëvonshme kombëtare do të publikohen çdo vit.
Pak më shumë se gjysma e rasteve ishin çështje të sjelljes, të cilat zakonisht ngrihen nga personeli brenda departamentit të policisë.
Rastet e mbetura, 524 (45%), ishin ankesa nga publiku. Pothuajse dy të tretat e ankesave nga publiku ishin për përdorimin e forcës, ndërsa 9% kishin të bënin me ngacmimet, 6% kishin të bënin me sulmin dhe 5% abuzimin e pozitës për qëllime seksuale.
Për akuzat për sjellje, 48% kishin të bënin me sjellje diskredituese jashtë orarit të punës, ndërsa 19% kishin të bënin me sulmin seksual, 13% me ngacmimin seksual dhe 6% me abuzimin e pozitës për qëllime seksuale.
Discussion about this post