Ministrja e Arsimit, Evis Kushi ka ndryshuar rregullat e punësimit në sistemin arsimor, iniciuar nga skandali i raportuar disa ditë më parë për punësimin e mësuesit të dënuar për pedofili dhe “ngacmim seksual” në Berat. Kushi bëri me dije se ka firmosur ndryshimin e udhëzimit për aplikimin në sistemin arsimor, të personave që janë dënuar nga gjykata me vendim të formës së prerë.
“Duke marrë shkas nga rasti i fundit i punësimit në Berat të një mësuesi që shkaktoi zemërim të lartë publik, sot firmosa menjëherë ndryshimin e udhëzimit që ndalon aplikimin dhe konkurrimin për të punuar si mësues të personave të dënuar, për të cilët gjykata ka marrë vendim të formës së prerë, për kryerjen e një vepre penale kundrejt të miturve apo për kryerjen e një vepre penale që lidhet me institucionet arsimore.”
Kushi shprehet se ndryshimi i rregullave do të shmang rrezikun ndaj të cilit nxënësit ekspozohen, nga përballja me persona që nuk garantojnë integritet të lartë moral dhe ligjor.
“Ky vendim shmang rrezikun që mund t’i vijë nxënësve tanë nga persona që nuk garantojnë integritet të lartë moral dhe ligjor. Angazhohemi që të vijojmë me një punë akoma më intensive për të ndërmarë iniciativa të tjera ligjore që garantojnë më shumë mbrojtjen dhe mirëqenien e fëmijëve tanë”, tha ministrja e Arsimit, Evis Kushi.
Në shkollën “22 Tetori” në Berat u emërua mësues për lëndët e Fizikës dhe Informatikës 62-vjeçari, Ëngjëll Bregu, që rezulton të jetë dënuar për “pedofili” dhe “ngacmim seksual” të fëmijëve në vitin 2003. Kanë qenë pikërisht prindërit e fëmijëve ata që e kanë shprehur këtë shqetësim për mediat, duke kërkuar largimin e mësuesit nga shkolla, largim që është kërkuar prej tyre edhe drejtorisë së shkollës, e cila ka dalë me justifikimin se ai është emëruar nga DAR.
Discussion about this post