Komisioni i Ligjeve është mbledhur ditën e sotme për të konstatuar mungesën e kandidaturave në raundin e parë për zgjedhjen e Presidentit, që do të konsumohet sot në seancën parlamentare.
Kreu i grupit parlamentar të PD, Enkelejd Alibeaj, tha se dështimi i këtij raundi të parë rëndon mbi supet e mazhorancës. Edhe pse nuk ka shkuar në tryezën e negociatave për shkak të konflikteve të brendshëm, Alibeaj tha se opozita ka bërë gjithçka për këtë proces duke kërkuar një President konsensual.
“Mbledhjet e Komisionit të Ligjeve nuk janë thjesht rutinë që shohin letrat, unë përfitoj nga ky moment, për t’ju bërë me dije juve si përfaqësues të mazhorancës, qëndrimin politik të Partisë Demokratike, i është bërë me dije mazhorancës, se ky proces do të duhet të përmbushë disa virtyte, që ti japë presidentit unitetin. Për të dalë në një produkt të dëshiruar nga shqiptarët, ne si parlament, kemi detyrën e krijimit të një procesi, të ketë disa qëndrime që në thelb të krijojnë një procedurë e cila të çojë në profil presidencial të gjithëpranuar, me legjitimitet, për të mbushur qartësisht karrigen presidenciale. Kushtetuta përcakton që zgjedhja e presidentit të jetë konsensuale. A jeni ju për të zgjedhur një president konsensual, qëndrimi ynë është ky, deri në përgjigjen tuaj, për opozitën dhe gjithë shqiptarët, ky dështim i këtij raundi të parë qëndron mbi supet tuaj. Përgjërimet që keni bërë deri tani, duken hipokrite, jemi në pritje të qëndrimit tuaj”, u shpreh Alibeaj.
Discussion about this post