Ish-Kryeministri dhe lideri historik i Partisë Demokratike, Sali Berisha, ka reaguar pas vrasjes së gjyqtarit të Apelit, Astrit Kalaja, i cili u ekzekutua me armë zjarri në sallën e gjyqit. Ai e cilësoi ngjarjen si një akt kriminal të rëndë dhe një tregues të drejtpërdrejtë të pasigurisë së thellë që ka përfshirë vendin.
“Ekzekutohet me armë zjarri gjyqtari i Apelit Astrit Kalaja. Mediat njoftojnë se një person i armatosur ka qëlluar brenda sallës së gjyqit ndaj gjyqtarit Kalaja, i cili ndërroi jetë nga plagët brenda pak minutash,” – shkroi Berisha në reagimin e tij.
Ai i shprehu ngushëllimet më të ndjera familjes, miqve dhe të afërmve të gjyqtarit, duke dënuar ashpër ngjarjen që tronditi sistemin e drejtësisë dhe gjithë opinionin publik.
“Dënoj me forcën më të madhe aktin e shëmtuar dhe kriminal ndaj gjyqtarit në sallën e gjyqit, dëshmi e kontrollit të rendit nga krimi dhe pasigurisë së madhe që ekziston sot në vend,” – theksoi Berisha.
Ai kërkoi ndëshkim maksimal për autorin dhe çdo person të përfshirë në këtë akt, duke e cilësuar atë si një goditje të rëndë ndaj themeleve të shtetit ligjor.
“Kërkoj dënimin më të rreptë ligjor për ekzekutorin dhe porositësit e këtij krimi shumë të rëndë,” – përfundoi ish-kryeministri.
Discussion about this post