Komiteti Shqiptar i Helsinkit (KShH) ka reaguar pas protestës së zhvilluar më 2 korrik pranë Kuvendit të Shqipërisë, duke shprehur shqetësim për mënyrën se si Policia e Shtetit ndërhyri ndaj protestuesve.
Sipas organizatës, në disa raste është përdorur forcë joproporcionale, në kundërshtim me standardet për menaxhimin e tubimeve publike.
Në deklaratën e saj, KShH thekson se monitorimi në terren tregoi se protesta kishte kryesisht karakter paqësor dhe se aktet e izoluara të dhunës, si hedhja e vezëve apo gurëve nga individë të veçantë, nuk mund t’u atribuohen të gjithë pjesëmarrësve dhe nuk ia heqin tubimit karakterin paqësor.
Sipas organizatës, pas incidentit me automjetet që tentuan të largoheshin nga ambientet e Kuvendit, sjellja e forcave të policisë ndryshoi ndjeshëm.
KShH pretendon se brenda një kohe të shkurtër policia kaloi nga monitorimi i situatës në rrethimin dhe shtyrjen e protestuesve, si edhe në përdorimin e gazit lotsjellës.
Juristët e KShH e konsiderojnë shqetësues faktin se, sipas vëzhgimeve të tyre, përdorimi i gazit lotsjellës nuk u parapri nga një paralajmërim publik me pajisje zanore dhe pa u lënë protestuesve kohë e mjaftueshme për t’u shpërndarë vullnetarisht.
Organizata ngre gjithashtu shqetësimin se mjetet e përdorura nga policia prekën në mënyrë të padiferencuar protestues paqësorë, gazetarë, vëzhgues dhe qytetarë të tjerë të pranishëm, ndërsa pretendon se në disa raste është ushtruar forcë edhe ndaj personave që ishin neutralizuar dhe ndodheshin në tokë.
Në përfundim, KShH u bën thirrje protestuesve të shmangin çdo akt dhune, ndërsa i kërkon Prokurorisë pranë Gjykatës së Shkallës së Parë Tiranë dhe Agjencisë së Mbikëqyrjes Policore të hetojnë në mënyrë të shpejtë, të paanshme dhe efektive çdo pretendim për përdorim të paligjshëm ose joproporcional të forcës nga efektivët e Policisë së Shtetit.
Discussion about this post