Një gjykatë në Turqi ka urdhëruar paraburgimin e komedianit të njohur Deniz Göktaş, i cili do të qëndrojë në burg deri në zhvillimin e gjyqit ndaj tij.
Ai akuzohet për fyerje të presidentit Recep Tayyip Erdogan dhe të vlerave fetare, sipas dokumenteve gjyqësore.
Göktaş, i njohur për shfaqjet e tij satirike “stand-up”, u arrestua në aeroportin e Stambollit më 2 korrik, teksa kthehej nga një udhëtim jashtë vendit.
Zyra e Prokurorit të Stambollit bëri të ditur se ndaj tij janë depozituar 185 ankesa dhe se hetimi lidhet me përmbajtjen e shfaqjeve dhe postimeve të tij në rrjetet sociale.
Sipas autoriteteve, hetimi përqendrohet në një shfaqje të mbajtur më 1 qershor në Stamboll, ku komediani bëri referenca satirike për presidentin Erdogan, Kuranin dhe kryebashkiakun e burgosur të Stambollit, Ekrem Imamoglu. Videoja e kësaj shfaqjeje, e publikuar në YouTube më 24 qershor, ka grumbulluar afro nëntë milionë shikime.
Avokati i tij, Metin Aslan, konfirmoi se ndër akuzat ndaj klientit të tij përfshihet edhe fyerja e presidentit. Ndërkohë, Göktaş i ka mohuar akuzat gjatë dëshmisë së dhënë në polici, duke deklaruar se shakatë e tij nuk kishin për qëllim të fyenin fenë apo Kuranin.
Ai ka sqaruar gjithashtu se përdorimi i termit “diktator” për presidentin Erdogan ishte një vlerësim politik dhe jo një fyerje personale.
Pas spekulimeve se ishte larguar nga Turqia për t’iu shmangur drejtësisë, komediani deklaroi se udhëtimi i tij kishte qenë për pushime dhe se kishte planifikuar të kthehej në vend.
Deniz Göktaş, i lindur në Ankara, e nisi karrierën në stand-up në vitin 2019 dhe në vitet e fundit është bërë një nga emrat më të njohur të humorit turk, me turne artistike në Evropë dhe Shtetet e Bashkuara.
Discussion about this post