Besar Iseni, mesfushori i skuadrës së Egnatias realizoi një gol të mrekullueshëm ndaj Vllaznisë në barazimin që dy skuadrat arritën në sfidën e vlefshme për javën e tetë të Superiores. Futbollisti theksoi se gola të tilla ka shënuar shpesh në karrierën e tij.
“Jam shumë i kënaqur që arrita të gjej golin. Ia dedikoj familjes këtë moment të veçantë. Nuk u mendova shumë pas marrjes së topit dhe godita menjëherë. Që në fillimet e karrierës, i kam praktikuar të tilla goditje dhe kam realizuar disa herë. Keqardhja e vetme ishte që nuk fituam. Luajtëm mirë dhe kontrolluam lojën. Mund të kishim shënuar edhe të tjerë gola, por mendoj se kemi qenë të pafat.
Terreni i mirë i fushës na lejoi që t’i shpalosnim vlerat më të mira. Barazimi nuk na shkon shumë për shtat, por megjithatë qëndrojmë përsëri në pesë vendet e para.
“Presidenti na ka mbështetur shumë dhe mundohemi t’ia shpërblejmë me paraqitje të mira. Në çdo javë kemi treguar ndeshje të mira. Me shokët e ekipit jemi ambientuar mrekullisht. Kam bindjen se do të vazhdoj të shënoj dhe mbi të gjitha të bëj një paraqitje edhe më të mirë në rolin tim. Ndihem mirë tek Egnatia dhe jam i lumtur që kam bërë këtë zgjedhje”, deklaroi Iseni.
Discussion about this post