Enkelejd Alibeaj pritet të mbledhë ditën e sotme grupin parlamentar të Partisë Demokratike për të diskutuar lidhur me komisionin për reformën territoriale. Mbledhja është thirrur sot në orën 15:00, ndërsa mësohet se nuk do të jetë i pranishëm asnjë nga deputetët që mbështesin ish kryeministrin Sali Berisha.
Mbledhja bëhet për të diskutuar mbi fillimin e procesit të reformës territoriale duke qenë se të mërkurën do të ketë mbledhjen e parë komisioni për reformën territoriale. Dje u zhvillua mbledhja e parë e deputetëve të PD-së, anëtarë të Komisionit të Posaçëm për reformën.
Mësohet se deputetët u dakordësuan që në mbledhjen më të parë të Grupit Parlamentar të PD-së t’i kërkohet çdo deputeti/je të Grupit që të sjellë me shkrim:
-Një analizë të problematikave të zonës ku ai është zgjedhur, në nivel bashkie dhe/ose qarku;
-Personat, qofshin funksionarë apo ish-funksionarë të PD-së në nivel vendor, apo edhe aktorë të tjerë relevantë, që duhet të konsultohen; dhe
-Propozimet e tij/saj për kriteret dhe standardet që duhen aplikuar për ndarjen e re administrative-territoriale të tilla si, por pa u kufizuar në, popullsia, gjeografia, zhvillimi ekonomik, shërbimet ndaj qytetarëve, lidhjet kulturore, historike etj.
Të gjitha materialet e sjella nga deputetët do t’i shërbejnë më pas Grupit të Punës që të hartojë një dokument të sintetizuar të problematikave në nivel bashkie dhe qarku, listën e personave që duhen konsultuar për të mbledhur opinionet e tyre, si dhe kriteret e standardet që duhen mbajtur në konsideratë për ndarjen e re administrativo-territoriale.
Discussion about this post