Mbledhja e Komisionit për Reformën Zgjedhore është shoqëruar me debate të ashpra mes përfaqësuesve të opozitës dhe maxhorancës. Shkak i debateve është bërë mungesa e Drejtorit të Përgjithshëm të Policisë së Shtetit në seancën dëgjimore, ku në vend të tij ishte i pranishëm zv.drejtori, Sokol Bizhga.
Gjatë mbledhjes, Bashkëkryetari i komisionit nga radhët e opozitës, Oerd Bylykbashi, e cilësoi si të papranueshme mospjesëmarrjen e drejtuesit kryesor të policisë. Bylykbashi theksoi se është dokumentuar edhe nga ndërkombëtarët që Policia e Shtetit ka ndërhyrë në mënyrë të dhunshme në procesin e zgjedhjeve.
Edhe anëtari demokrat, Gent Strazimiri, mbajti të njëjtit qëndrim, duke kërkuar shtyrjen e mbledhjes me arsyetimin se përfaqësimi i policisë nuk ishte në nivelin e duhur. Nga ana tjetër, bashkëkryetari i maxhorancës, Damian Gjiknuri, hodhi poshtë kërkesat e opozitës, pasi, sipas tij, drejtuesit e policisë nuk kanë detyrim ligjor të raportojnë për punën e tyre përpara këtij komisioni.
Pjesë nga diskutimi:
Bylykbashi: Është e papranueshme që drejtori i Policisë së Shtetit nuk vjen në një seancë dëgjimore të Parlamentit. Është dokumentuar edhe nga ndërkombëtarët që Policia e Shtetit ka ndërhyrë në mënyrë të dhunshme në procesin e zgjedhjeve. Policia është rikthyer problem për dy arsye: për atë që duhet të bëjë dhe nuk e bën.
Strazimiri: Nuk duhet të jetë këtu zv/drejtori. Komisioni nuk është seminar. Si mund të vijë një zv/drejtor, madje edhe pa staf? Mbledhja duhet shtyrë.
Gjiknuri: Ai nuk ka detyrim për të raportuar këtu, është Komisioni i Sigurisë apo komisione të tjera. Ata raportojnë për punën e tyre në komisione të posaçme, ne s’jemi komision hetimor.
Bizhga: Në të dyja rastet kam qenë unë protagonisti që i kam propozuar ndryshimet për Policinë e Shtetit dhe unë kam qenë i autorizuar, kam ndjekur gjithmonë aktivitetet zgjedhore. Drejtori i përgjithshëm ishte drejtues në një qark, kurse unë kam qenë përgjegjësi për procesin zgjedhor të vitit 2025.
Discussion about this post