Kreu i KQZ-së, Ilirjan Celibashi theksoi se nëse Kuvendi nuk plotëson boshllëqet ligjore, vota e emigrantëve nuk mundësohet. I pyetur nëse mund të lejohet votimi nga jashtë pa ndryshim të Kodit Zgjedhor dhe nëse mund të bëhen akte nënligjore, ai tha:
“I qëndroj të njëjtit arsyetim në lidhje me këtë çështje. Nëse Kuvendi nuk plotëson boshllëkun ligjor sipas urdhërimit të Gjykatës Kushtetuese, nuk mund të zhvillohet votimi nga jashtë. Nuk është përgjegjësi e KQZ-së me këtë kuadër rregullator kushtetues dhe ligjor për të nxjerrë akte nënligjore që do të mundësojnë votimin nga jashtë.
Gjykata Kushtetuese edhe pse e di se ka diskutime dhe qëndrime ndryshe nga ky i imi, ka vendosur dhe ka thënë se mungon ligji për të zhvilluar votimin nga jashtë. Sa kohë mungon ligji, çfarë akti nënligjor mund të nxjerrësh si institucion. Çfarë parashikon kushtetuta për votimin nga jashtë. Nuk është si rasti i shpërndarjes së mandateve për të cilën ka një lloj përcaktimi.”, theksoi Celibashi.
Ilirjan Celibashi tha se është në dorë të partive politike ndryshimi i kodit të ri zgjedhor.
“E dimë të gjithë që nëse do të duhet që do bëhen ndryshime në ligjin zgjedhor duhet të datojnë jo më shumë se një vit ose në rastin më ekstrem 6 muaj para ditës së zgjedhjeve.
Nëse do të mbetet ky kod zgjedhor zgjedhjet do të bëhen, nuk e di të them ca impakti do ketë, por duket që qoftë faktori politik, por edhe ai institucional kanë pranuar nevojën për të bërë ndryshime në kod. Do të ishte mirë që partitë politike të angazhohen për t’i realizuar këto ndryshime sa më shpejt të jetë e mundur
Kemi bërë publike listën, çështjet që duhen të adresohen dhe ngelet në vlerësimin e partive politike, të Kuvendit për ti adresuar ose jo ato çështje që për ne konsiderohen problematike, nëse mund ta them kështu.”, u shpreh ai.
Discussion about this post